O‘zbekistonda koronavirusga chalingan bemorning kim bilan muloqot qilganligini ko‘rsatuvchi mobil ilova joriy etiladi

O‘zbekiston Sog‘liqni saqlash vaziri Alisher Shodmonov va Janubiy Koreya Sog‘liqni saqlash va ijtimoiy ta’minot vaziri Pak Ning Xu o‘rtasida telefon orqali muloqot bo‘lib o‘tdi. Muloqotda tibbiyot sohasidagi hamkorlikni yanada kengaytirish, shu jumladan, COVID-19’ga qarshi kurash borasida birgalikdagi sa’y-harakatlarni kuchaytirish masalalariga alohida e’tibor qaratilgan. Bu haqda vazirlik matbuot xizmati xabar berdi.

Ma’lumotlarga ko‘ra, ikki davlat vazirlari O‘zbekistonda tegishli vazirlik va idoralar bilan birgalikda COVID-19’ga qarshi mobil ilovalarini yaratib, treking usulini joriy etish borasida kelishuvga erishgan. Bu esa xuddi Janubiy Koreyadagidek koronavirusga chalingan bemorni kim bilan muloqot qilgan va qaysi hududlarda bo‘lganligini innovatsion tarzda aniq ko‘rsatib berish imkoniyatini yaratadi.

Bundan tashqari, hamkorlikda koronavirus infeksiyasiga qarshi kurashda test va dorilarni ishlab chiqish masalalari ham muhokama etilgan. Jumladan, COVID-19’ga qarshi vaksinani birgalikda klinik sinovlarini o‘tkazish to‘g‘risida ham kelishuvga erishilgan. O‘z navbatida Janubiy Koreya Sog‘liqni saqlash va ijtimoiy ta’minot vaziri Pak Ning Xu ushbu vaksinani dunyo mamlakatlariga taqdim etishda O‘zbekiston alohida ustuvor mavqega ega bo‘lishini ta’kidlab o‘tgan.

Muzokaralar yakunida sog‘liqni saqlash sohasida O‘zbekiston—Janubiy Koreya hamkorligi markazining imkoniyatlarini yanada kengaytirishga ham kelishib olindi.

Avvalroq Apple va Google koronavirus tarqalishini kuzatuvchi mobil ilova to‘g‘risidagi ma’lumotlar bilan bo‘lishgan edi.

Eslatib o‘tamiz, Koreya Respublikasi Sog‘liqni saqlash va ijtimoiy ta’minot vaziri Pak Ning Xu o‘tgan yil aprel oyida mamlakatimizga tashrifi davomida Sog‘liqni saqlash vazirligining “O‘zbekiston Respublikasi sog‘liqni saqlash a’lochisi” ko‘krak nishoni hamda Toshkent tibbiyot akademiyasining faxriy professori unvoni bilan taqdirlangan edi.