Adliya vaziri o‘rinbosari davlat fuqarolik xizmatchisi nega siyosiy partiyaga a’zo bo‘la olmasligini izohladi

Adliya vaziri o‘rinbosari Bahrom Qo‘chqorov vazirlikda tashkil etilgan brifingda “Davlat fuqarolik xizmati to‘g‘risida”gi yangi qonun loyihasining 13-moddasida ko‘rsatilgan so‘nggi bandga izoh berdi. Loyihadagi ushbu moddaning so‘nggi bandi xatboshisida davlat fuqarolik xizmatchisi siyosiy partiyaga a’zo bo‘lishi mumkin emasligi qayd etilgan.

Jurnalistlar siyosiy partiyaga a’zo bo‘lish fuqarolarning konstitutsiyaviy huquqi ekanligi, bu konstitutsiyada belgilangani, ular erkin fikr bildirishi, partiyaga a’zo bo‘lishi siyosiy huquqi ekanligini qayd etgan.

“Endi o‘qituvchi davlat fuqarolik xizmatchisi bo‘lsa, siyosiy partiyaga a’zo bo‘la oladimi yo‘qmi? Siyosiy partiya harakatlarida ishtirok eta olmaydimi? Qonun loyihasida aniq reestr ko‘rsatilishi kerak, qayerda boshlanib, qayerda tugaydi, qaysi kasblarga taalluqli. Chunki saylovlar bor, har bir fuqaro o‘zining siyosiy qarashlarini ifoda etishi kerak. Buning uchun esa qaysidir partiyaga a’zo bo‘lishi, uyushishi kerak, ushbu band mavhum bo‘lib qolgan”, — degan savolga javoban Qo‘chqorov qisqacha izoh berib o‘tgan.

Jumladan, vazir o‘rinbosari misol tariqasida bitta davlat organi xodimlari to‘liq bitta partiyaga a’zo bo‘lishini noto‘g‘ri ekanligini keltirdi. Davlat xizmati nazariyasida, olingan xorijiy ilg‘or davlatlar amaliyotida ham davlat xizmatining neytralitet, degan prinsipi borligini qayd etdi. Davlat xizmatchisi yoki fuqarolik xizmatchisi ma’muriy yoki professional xizmatchi, siyosiy xizmatchi esa partiyalar, siyosiy masalalar bilan bog‘liq mansabdor shaxsligi, misol uchun, vazir ham siyosiy partiyalarning a’zosi bo‘lishi mumkinligini bildirdi.

Boshqa davlatlarni oladigan bo‘lsak, hukumatni qanday shakllantiriladi? Bu partiyaning buncha a’zosi kirdi hukumatga, u partiyaning shuncha a’zosi, kirdi deydi. Lekin davlat fuqarolik xizmatida neytralitet bor, bu siyosiy maqsadlar bilan aralashib ketmasligi kerak. Bu davlat qonunini belgilangan tartibda amalga oshiradigan xizmat. Shuning uchun bu yerda gap davlat fuqarolik xizmatchisi haqida ketyapti. Siyosiy xizmatchi partiyalar bilan bog‘liq, uni partiyalar saylaydi.

Lekin bu yerda biz hammasining partiyaga a’zo bo‘lishi mumkinligini beradigan bo‘lsak, yuqorida keltirgan bitta misolim savolga javob bo‘lmaydi. Bitta davlat organining asosiy qismi bitta partiya a’zolari, bu yerda manfaatlar to‘qnashuvi bo‘ladi. Bu yerda aynan shu davlat xizmatining neytralitetini yo‘qotib qo‘yamiz. Ya’ni siyosiy partiyalarning kuchi o‘zgargani sari davlat xizmatida ham o‘zgarish bo‘lib ketaveradi. Bunday bo‘lmasligi kerak, bizda muqim, barqaror rivojlangan davlat xizmati kerak.

Bahrom Qo‘chqorov, Adliya vaziri o‘rinbosari