Niderlandiyaning SciSports axborot kompaniyasi Belgiyaning Leven universiteti bilan hamkorlikda “Barselona” hujumchisi Lionel Messi va “Yuventus” forvardi Krishtianu Ronalduning harakatlari sifatlilik darajasini o‘rganish maqsadida tadqiqot o‘tkazdi. Bu haqda “Sport.es” xabar bermoqda.
Tadqiqotda Messi Ronaldudan ikki baravar kuchliroq ekani ma’lum bo‘lgan. Ilmiy izlanishda futbolchilarning harakatlari samaradorligi va boshqa turli jihatlari o‘rganilgan. Jumladan, ikki yulduzning o‘yin davomidagi barcha harakatlari va uchrashuv natijalariga ta’sir o‘tkazishiga alohida e’tibor qaratilgan.
Ta’kidlash joizki, tadqiqot 2013—2016-yillarni o‘z ichiga oladi, bu nazariy jihatdan Messiga qarshi ishlashi kerak edi, boisi Ronaldu ushbu davrda eng yuqori ko‘rsatkichga erishgan va bir qancha sovrinlarga ega chiqqan.
Messining natijasi 1,21 ballni tashkil qilgan bo‘lsa, Krishtianuning foydali ish koeffitsiyenti 0,61 ga teng bo‘lgan.
Mavzuga doir:
- Ronaldu yoki Messi? Tomas Myuller tanlovini ma’lum qildi
- Ronalduning xarakteri, van Bastencha nafis did va Messining chap oyog‘i. Ideal hujumchi qanday bo‘ladi?
Izlanishlar shuni ko‘rsatdiki, Messi to‘p bilan ko‘proq muomala qiladi, xavfli vaziyatlar yaratadi va Ronalduga qaraganda, uchrashuvning yakuniy natijasiga ko‘proq ta’sir o‘tkazadi.
Messi joriy mavsumda La Liganing 22 uchrashuvida 19 ta gol va 12 ta golli uzatmaga mualliflik qilgan bo‘lsa, Ronaldu 22 ta o‘yinda o‘z hisobiga 21 ta gol va 3 ta assist yozdirib qo‘ygan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)