Argentinalik jurnalist Kons Preti Insider nashriga futbolchi Lionel Messiga o‘xshagan soyali surati tufayli qanday mashhur bo‘lganini aytib berdi.
Surat tarixi
Preti 2014-yilda Los-Anjelesdagi do‘stlarinikida ziyoratda bo‘lganda devorga qarab suratga tushgan.
Jurnalist suratni ijtimoiy tarmoqlarga joylashtirgan va birozdan so‘ng post ostidagi ikkita izohni ko‘rgan.
“Haha, soyang yuzga o‘xshaydi”, deb yozgan kimdir.
“Shoshma! Bu Messining yuzi-ku!”, degan jurnalistning dugonasi.
Avvaliga Kons bunga unchalik ahamiyat bermaydi, chunki Messiga o‘xshashligi haqida birinchi yozgan tanishi argentinalik va futbolchining muxlisi.
Keyinroq Preti bu suratni Twitter’da (hozirda X deb ataladi) bo‘lishadi va boshqa foydalanuvchilarning Messiga o‘xshashligi haqida qanday fikrdaligini so‘raydi.
Ma’lum bo‘lishicha, ko‘pchilik foydalanuvchilar afsonaviy futbolchini Kons soyasida ko‘radi va natijada surat tarmoqda keng tarqaladi.
Kichik mashhurlik
Vatanida jurnalist qiz mashhur bo‘lib ketadi. Bundan tashqari, Konsning turmush o‘rtog‘i ular uchrasha boshlaganlarida, uning do‘stlari o‘sha surat qahramonini darhol taniganliklarini aytadi.
Hozirgacha ijtimoiy tarmoq foydalanuvchilari mazkur suratni joylab, qizning soyasi Lionel Messiga o‘xshab qolganiga hayron qolmoqda. Rasmni sport ishqibozlari ham baham ko‘rishda davom etmoqda va ba’zi foydalanuvchilar memlar yaratgan.
Konsning so‘zlariga ko‘ra, surat har yili internetga tarqaladi va uning do‘stlari va tanishlari keyingi repostni ko‘rganlarida uni doimiy ravishda ushbu fotosuratda belgilashadi.
Oxir-oqibat e’tibor pasayadi deb o‘ylagandim, lekin unday bo‘lmadi. Oxirgi ikki kun ichida ijtimoiy tarmoqlardagi uchta turli futbol akkaunti mazkur suratimni joylashtirdi.
So‘nggi paytdagi suratning mashhurlik to‘lqini meni ushbu fotosurat tushirilgan futbolkaga buyurtma berishga undadi. Men har ehtimolga qarshi 2 ta olib qo‘ydim: tasodifan Messi bilan uchrashib qolsam, futbolkalardan birini unga sovg‘a qilaman, — deydi jurnalist.
Izoh (0)