Turkiya, Bolgariya, Yamayka, Mavrikiy, Kanada, Portugaliya, Saudiya Arabistoni va Meksika 2020-yilda eng xavfsiz sayyohlik yo‘nalishlari bo‘ladi. “RIA Novosti”ning yozishicha, Butunjahon turizm va sayohatlar kengashi (WTTC) mutaxassislari shunday qarorga kelgan.
WTTC xalqaro nodavlat tashkilot bo‘lib, unga turizm yo‘nalishida faoliyat yurituvchi dunyoning turli mamlakatlaridagi kompaniyalar vakillari a’zodir.
Tashkilot sog‘liqni saqlash sohasidagi mutaxassislar bilan birgalikda “Xavfsiz sayohatlar” maxsus protokolini ishlab chiqqan bo‘lib, unga muvofiq koronavirus pandemiyasidan keyin sayyohlar xavfsizligini ta’minlash uchun yangi talablarni joriy etgan mamlakatlar va shaharlarga tegishli yorliq beriladi.
Protokollar mehmonxonalar, restoranlar, aviakompaniyalar, temiryo‘l stansiyalari va aeroportlar hamda turizm sohasidagi boshqa muassasa va tashkilotlar uchun mo‘ljallangan. Unda binolarni dezinfeksiyalash, kontaktsiz texnologiyalarni joriy etish va mijozlarning ijtimoiy masofasi uchun yangi qoidalar ko‘zda tutilgan.
Sayohatchilar eng xavfsiz bo‘lgan shaharlarga, tashkilot Ispaniyaning Madrid, Barselona va Sevilya va Meksikaning Kankun shahrini kiritgan. Xavsiz hududlar qatoridan Kanadaning Ontario provinsiyasi, shuningdek, Meksikadagi Panta-Sur qo‘riqxonasi va Yukatan yarimoroli ham o‘rin olgan.
WTTC prezidenti Gloriya Gevara turizm sohasini tez tiklanishini ta’minlayotgan davlatlarga minnatdorchilik bildirdi va yaqin haftalarda xavfsiz yo‘nalishlar ro‘yxatini kengaytirishga va’da berdi.
Ma’lumot uchun, O‘zbekistonda turizmning tiklanishi uch bosqichda amalga oshiriladi. Birinchi bosqich ichki turizm orqali ularning faoliyatini qayta tiklashga bag‘ishlanadi. Shuningdek, xalqaro turizmni tiklashga maksimal tayyor bo‘lish uchun ushbu bosqichda Uzbekistan. Safe travel Guaranteed xavfsizlik tizimi joriy qilinadi.
Izoh (0)