JSST vakili Rossiyada koronavirus qurbonlari sonining kamligini noodatiy deb atadi

Jahon sog‘liqni saqlash tashkilotining sog‘liqni saqlash sohasida favqulodda vaziyatlar bo‘yicha dasturi direktori Maykl Rayanning ma’lum qilishicha, Rossiyada koronavirus oqibatida yuzaga kelayotgan o‘lim darajasining pastligini “tushunish qiyin”. Bu haqda Meduza xabar berdi.

“Albatta, o‘limlar sonining kasallanganlar soniga nisbatan juda pastligi noodatiy”, — deya ta’kidlagan Rayan. Uning qayd etishicha, Rossiya aholisining o‘rtacha yoshi va sog‘liqni saqlash tizimi o‘lim darajasi yuqori bo‘lgan Yevropa mamlakatlaridan ko‘p farq qilmaydi.

Rayanning ta’kidlashicha, turli mamlakatlar koronavirusdan yuzaga keladigan o‘lim statistikasini turlicha hisoblaydi. Ba’zi davlatlar bu statistikaga barcha kasallanganlarni qo‘shadi. Bu esa, agar o‘limning asosiy sababi koronavirus bo‘lmasa, statistikaning oshib ketishiga olib kelishi mumkin.

Shuningdek, Rossiyada COVID-19 bilan kasallanish holatlari sonining yuqoriligi fonida o‘lim darajasining pastligi keng miqyosda test o‘tkazilgani bilan bog‘liq bo‘lishi mumkin. “Rossiya hukumati o‘limlarni hisoblash yondashuvini tahlil qilgani va uni to‘g‘ri olib borayotganiga ishonch hosil qilgani muhim hisoblanadi”, — deya fikrini bildirgan Rayan.

10-iyun ma’lumotlariga ko‘ra, Rossiyada 493 657 kishida koronavirus aniqlangan, ulardan 6358 kishi vafot etgan. Kasallanganlar soni bo‘yicha Rossiya dunyoda uchinchi o‘rinda, o‘limlar soni bo‘yicha esa 13-o‘rinda turibdi.

Financial Times va The New York Times Rossiyada koronavirus qurbonlari soni kamaytirib ko‘rsatilganini taxmin qilgan. Rossiya hukumati statistika o‘zgartirilmaganini ma’lum qilgan. Rossiya prezidenti matbuot kotibi Dmitriy Peskov o‘lim darajasining pastligini Rossiya sog‘liqni saqlash tizimining samaradorligi bilan izohlagan.

Meduza tomonidan o‘tkazilgan o‘rganishlar xulosasiga ko‘ra, o‘limlarni hisoblashning amaldagi usuli hududlardagi mansabdorlarga COVID-19 oqibatida yuzaga kelgan o‘limlarni ongli ravishda yashirishga imkon beradi.

Avvalroq COVID-19’dan vafot etganlar soni dunyo miqyosida 400 ming nafardan oshib ketgani haqida xabar berilgandi.