Serbiyada maosh ololmayotgan futbolchilar ochlik e’lon qildi

Futbol bo‘yicha Serbiya 3-divizioni vakili “Borats” klubi futbolchilari maosh to‘lanmayotgani sabab ochlik e’lon qildi.

Eurosport’ning xabar qilishicha, norozilik namoyishlarida klubning 25 nafar futbolchisi ishtirok etmoqda. “Borats” klubi qarzlari ko‘payib ketgani bois bankrotlik e’lon qilgan va jamoa tarqatib yuborilgan. Klub xo‘jayinlari mashhur bo‘lmagan “Provo” klubini sotib olgan holda uning nomini “Borats 1926”ga o‘zgartirgan. Biroq funksionerlar sobiq futbolchilar bilan hisob-kitob qilishga shoshilmayapti.

Serbiya futbolchilari kasaba uyushmasi (SPFN) rahbari Mirko Poleditsaning ma’lum qilishicha, tarqatib yuborilgan “Borats” jamoasi futbolchilarining norozilik namoyishlari 8-iyundan buyon davom etmoqda. Sportchilar norozilikni namoyish etib, shahar meriyasi yonida tuni bilan qolgan.

“Agar hukumat sportchilarga bunday munosabatda bo‘lishdan uyalmas ekan, biz ham namoyishlar o‘tkazishdan uyalmaymiz”, — deydi Poleditsa.

“Manchester Yunayted”ning serbiyalik yarim himoyachisi Nemanya Matich ham futbolchilarni qo‘llab-quvvatlagan: “Shuni aytishni xohlardimki, siz yolg‘iz emassiz, men sizlar bilanman”.

Professional futbolchilar assotsatsiyalari xalqaro federatsiyasi (FIFPro) “Borats” moliyaviy muammolar sabab tarqatib yuborilganini tasdiqladi. Shuningdek aytilishicha, “Borats 1926” klubini eski rahbariyat boshqarmoqda, hatto bosh murabbiy ham o‘zgarmagan va klub uy o‘yinlarini avvalgi stadionida o‘tkazmoqda. Biroq rahbariyat sobiq futbolyailarining maoshini to‘lab berish niyatida emas.

“FIFPro yuridik tomonlarini o‘zgartirgan holda futbolchilar va kreditorlar oldidagi qarzini to‘lashdan qochadigan klublarning bunday vijdonsiz harakatlariga anchadan buyon qarshi bo‘lib keladi”, — deyiladi tashkilot bayonotida.