O‘zbekiston Professional futbol ligasi koronavirus tufayli yuzagan kelgan tanaffus sabab 2020-yilgi yozgi transferlar oynasi muddatini o‘zgartirgani haqida xabar berilgandi.
Mamlakatda yozgi transferlar oynasi iyul oyidan avgustga ko‘chirilgan. Shu tariqa transfer oynasi 10—31-avgust oralig‘ida bo‘lib o‘tadi. Oldin esa bu muddat 6—31-iyul oralig‘ida amalda bo‘lgan.
Shu masala yuzasidan PFL bosh direktori vazifasini bajaruvchi Diyor Imomxo‘jayev quyidagilarni bayon qildi.
“O‘zPFL yozgi transfer muddatini bundan 9 oy avval 6—31-iyul qilib belgilagandi. Biz uni 10—31-avgust deb o‘zgartirishga majbur bo‘ldik.
Boisi, karantin davrida 2,5 oy futbolsiz qoldik. Rejamiz bo‘yicha, 9-avgust kuni Coca Cola Superliganing birinchi davrasi o‘z yakuniga yetadi. Bu vaqtgacha Pro liga, Birinchi liga va ayollar Oliy ligasida 6 tadan tur uchrashuvlari o‘tkaziladi. Shundan kelib chiqib, transfer muddati hamma uchun bir xil bo‘ladi. Qolgan ligalar ham transfer oynasi ochilguniga qadar bir nechta tur o‘tkazib ulguradi.
2020-yilgi transfer bozorida o‘zgarishlar katta bo‘ladi va mavsumning o‘rtasida ko‘chib yuruvchi futbolchilar avvalgi yillarga qaraganda sezilarli kamayadi. PFL bu yo‘lda qadam tashlab ulgurgan”, — deydi Imomxo‘jayev.
Shuningdek, Diyor Imomxo‘jayev “Daryo” muxbiri bilan suhbatda “ko‘chmanchi futbolchilar” transferi qanday qilib kamayishiga izoh berdi.
“Avval futbolchilar yangi klublari bilan 1-2 yillik shartnoma tuzib, uni oxirigacha tugatmasidan boshqa klublarga o‘tib ketavergan. Oldin bunga hech qaysi tashkilot e’tibor qaratmagan. Shu boisdan mavsumlar oralig‘ida butun boshli jamoa tarkiblari yangilanib, o‘zgarib ketgan. Natijada “ko‘chmanchi futbolchilar” paydo bo‘ldi. Endi esa bu narsa sezilarli darajada kamayadi. Boisi PFL reglamentida endi futbolchilar yoki transfer qilinishi lozim, yoki shartnomasini oxirigacha tugatishi kerak degan band bor. Ya’ni endilikda biror bir futbolchi o‘zidan o‘zi boshqa klubga shartnomasini buzib o‘tib keta olmaydi. Uni o‘z safiga qo‘shib olmoqchi bo‘lgan klub, futbolchi transferi uchun klubiga pul to‘lashi yoki shartnomasi tugashini kutishi kerak bo‘ladi. Faqatgina uzrli sabablar bo‘lgan taqdirdagina (shaxsiy, oilaviy sabablar) futbolchini boshqa klub ro‘yxatidan o‘tkazilishi ko‘rib chiqilishi mumkin”, — deydi PFL rahbari.
Eslatib o‘tamiz, mart oyida to‘xtab qolgan Superliga bahslariga 13-iyundan qayta start beriladi.
- Superliga 4-turining barcha o‘yinlari MTRKning 3 ta kanali orqali jonli efirda namoyish etiladi
- Superliga 4-tur o‘yinlarini boshqarib boradigan hakamlar ma’lum bo‘ldi
- Superliga 5-tur o‘yinlari boshlanish vaqtlari ma’lum bo‘ldi. Barcha o‘yinlar jonli efirda namoyish etiladi
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)