Футбол бўйича Сербия 3-дивизиони вакили «Борац» клуби футболчилари маош тўланмаётгани сабаб очлик эълон қилди.
Eurosport’нинг хабар қилишича, норозилик намойишларида клубнинг 25 нафар футболчиси иштирок этмоқда. «Борац» клуби қарзлари кўпайиб кетгани боис банкротлик эълон қилган ва жамоа тарқатиб юборилган. Клуб хўжайинлари машҳур бўлмаган «Прово» клубини сотиб олган ҳолда унинг номини «Борац 1926»га ўзгартирган. Бироқ функционерлар собиқ футболчилар билан ҳисоб-китоб қилишга шошилмаяпти.
Сербия футболчилари касаба уюшмаси (SPFN) раҳбари Мирко Поледицанинг маълум қилишича, тарқатиб юборилган «Борац» жамоаси футболчиларининг норозилик намойишлари 8 июндан буён давом этмоқда. Спортчилар норозиликни намойиш этиб, шаҳар мерияси ёнида туни билан қолган.
«Агар ҳукумат спортчиларга бундай муносабатда бўлишдан уялмас экан, биз ҳам намойишлар ўтказишдан уялмаймиз», — дейди Поледица.
«Манчестер Юнайтед»нинг сербиялик ярим ҳимоячиси Неманя Матич ҳам футболчиларни қўллаб-қувватлаган: «Шуни айтишни хоҳлардимки, сиз ёлғиз эмассиз, мен сизлар биланман».
Профессионал футболчилар ассоцациялари халқаро федерацияси (FIFPro) «Борац» молиявий муаммолар сабаб тарқатиб юборилганини тасдиқлади. Шунингдек айтилишича, «Борац 1926» клубини эски раҳбарият бошқармоқда, ҳатто бош мураббий ҳам ўзгармаган ва клуб уй ўйинларини аввалги стадионида ўтказмоқда. Бироқ раҳбарият собиқ футболяиларининг маошини тўлаб бериш ниятида эмас.
«FIFPro юридик томонларини ўзгартирган ҳолда футболчилар ва кредиторлар олдидаги қарзини тўлашдан қочадиган клубларнинг бундай виждонсиз ҳаракатларига анчадан буён қарши бўлиб келади», — дейилади ташкилот баёнотида.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)