Shavkat Mirziyoyev 4-iyun kuni poytaxtning Yakkasaroy tumanida qurilayotgan biznes-markazlar, mehmonxona va savdo majmualari loyihalari bilan tanishdi. Bu haqda “Axborot 24” dasturida ma’lum qilindi.
Yakkasaroy tumani hokimi Anvar Sayfutdinovning ma’lum qilishicha, tuman shahar markazida joylashgani sabab ish o‘rinlari yaratishda asosiy e’tibor xizmat ko‘rsatish sohasiga qaratilmoqda.
Taqdimot davomida ta’kidlanishicha, Bobur va Muqimiy ko‘chalari kesishmasidagi 1,06 gektar maydonda 41 qavatli biznes-markaz qurish rejalashtirilmoqda. Uning yonidan umumiy ovqatlanish maskanlari va ko‘ngilochar obyektlarga ega to‘rt qavatli savdo kompleksi ham o‘rin oladi.
Hokimning so‘zlariga ko‘ra, qiymati 907,2 milliard so‘mga teng loyiha Piramit Global kompaniyasi tomonidan Turkiya va Buyuk Britaniyalik sheriklar bilan amalga oshirilmoqda. Xorijiy investitsiyalar miqdori 90 million dollarni tashkil etadi. Bu orqali 350 ta ish o‘rni yaratiladi, obyektning o‘zini esa 2022-yilning to‘rtinchi choragida foydalanishga topshirish kutilmoqda.
“Gazeta.uz”ning yozishicha, Piramit Global kompaniyasi 2019-yilning noyabrida ro‘yxatdan o‘tgan bo‘lib, ixtisoslashtirilgan qurilish ishlari bilan shug‘ullanadi.
Shota Rustaveli ko‘chasida esa maydoni 0,5 gektarga teng 705,6 milliard so‘mlik loyiha amalga oshiriladi. U turar joy komplekslari, shuningdek, dastlabki to‘rt qavatida biznes-markaz, qolganlarida mehmonxona joylashgan binoni o‘z ichiga oladi.
Jalb etiladigan xorij investitsiyalari miqdori 70 million dollarni, ish o‘rinlari esa — 250 tani tashkil etishi kutilmoqda. Obyekt 2022-yilning uchinchi choragida foydalanishga topshirilishi rejalashtirilmoqda.
Mazkur loyiha tashabbusini Tako Sales kompaniyasi germaniyalik hamkorlari bilan ilgari surgan. Kompaniya 2003-yilda ro‘yxatdan o‘tgan bo‘lib, noturar joylarni boshqarish va ularning ijarasi bilan shug‘ullanadi.
Bundan tashqari, Usmon Nosir va Toshkent halqa avtomobil yo‘li kesishmasida 1,5 gektar maydonni egallaydigan uchta obyekt loyihasi taqdim etilgan. Birinchi obyekt mehmonxona bo‘lsa, ikkinchisi — turar joy binosi, ular orasida besh qavatli savdo markazi o‘rin oladi.
Loyiha tashabbuskori Central Asian Construction kompaniyasi bo‘lib, u o‘z mablag‘laridan 150 milliard so‘m yo‘naltirish orqali 50 ta ish o‘rni yaratadi. Yakkasaroy hokimining so‘zlariga ko‘ra, ushbu obyektlar 2022-yilning to‘rtinchi choragida foydalanishga topshiriladi.
Central Asian Construction saytida yozilishicha, kompaniya 2001-yildan buyon faoliyat ko‘rsatib keladi, u asosan plastik mahsulotlar ishlab chiqarish va ularning savdosi bilan shug‘ullanadi.
Izoh (0)