Шавкат Мирзиёев 4 июнь куни пойтахтнинг Яккасарой туманида қурилаётган бизнес-марказлар, меҳмонхона ва савдо мажмуалари лойиҳалари билан танишди. Бу ҳақда «Ахборот 24» дастурида маълум қилинди.
Яккасарой тумани ҳокими Анвар Сайфутдиновнинг маълум қилишича, туман шаҳар марказида жойлашгани сабаб иш ўринлари яратишда асосий эътибор хизмат кўрсатиш соҳасига қаратилмоқда.
Тақдимот давомида таъкидланишича, Бобур ва Муқимий кўчалари кесишмасидаги 1,06 гектар майдонда 41 қаватли бизнес-марказ қуриш режалаштирилмоқда. Унинг ёнидан умумий овқатланиш масканлари ва кўнгилочар объектларга эга тўрт қаватли савдо комплекси ҳам ўрин олади.
Ҳокимнинг сўзларига кўра, қиймати 907,2 миллиард сўмга тенг лойиҳа Piramit Global компанияси томонидан Туркия ва Буюк Британиялик шериклар билан амалга оширилмоқда. Хорижий инвестициялар миқдори 90 миллион долларни ташкил этади. Бу орқали 350 та иш ўрни яратилади, объектнинг ўзини эса 2022 йилнинг тўртинчи чорагида фойдаланишга топшириш кутилмоқда.
«Gazeta.uz»нинг ёзишича, Piramit Global компанияси 2019 йилнинг ноябрида рўйхатдан ўтган бўлиб, ихтисослаштирилган қурилиш ишлари билан шуғулланади.
Шота Руставели кўчасида эса майдони 0,5 гектарга тенг 705,6 миллиард сўмлик лойиҳа амалга оширилади. У турар жой комплекслари, шунингдек, дастлабки тўрт қаватида бизнес-марказ, қолганларида меҳмонхона жойлашган бинони ўз ичига олади.
Жалб этиладиган хориж инвестициялари миқдори 70 миллион долларни, иш ўринлари эса — 250 тани ташкил этиши кутилмоқда. Объект 2022 йилнинг учинчи чорагида фойдаланишга топширилиши режалаштирилмоқда.
Мазкур лойиҳа ташаббусини Taco Sales компанияси германиялик ҳамкорлари билан илгари сурган. Компания 2003 йилда рўйхатдан ўтган бўлиб, нотурар жойларни бошқариш ва уларнинг ижараси билан шуғулланади.
Бундан ташқари, Усмон Носир ва Тошкент ҳалқа автомобиль йўли кесишмасида 1,5 гектар майдонни эгаллайдиган учта объект лойиҳаси тақдим этилган. Биринчи объект меҳмонхона бўлса, иккинчиси — турар жой биноси, улар орасида беш қаватли савдо маркази ўрин олади.
Лойиҳа ташаббускори Central Asian Construction компанияси бўлиб, у ўз маблағларидан 150 миллиард сўм йўналтириш орқали 50 та иш ўрни яратади. Яккасарой ҳокимининг сўзларига кўра, ушбу объектлар 2022 йилнинг тўртинчи чорагида фойдаланишга топширилади.
Central Asian Construction сайтида ёзилишича, компания 2001 йилдан буён фаолият кўрсатиб келади, у асосан пластик маҳсулотлар ишлаб чиқариш ва уларнинг савдоси билан шуғулланади.
Изоҳ (0)