Samarqand viloyatida ikki kishini xorijga ishga jo‘natishni va’da qilib ulardan jami 6,5 ming AQSh dollari miqdorida pul olib, aldab ketgan fuqaro hibsga olindi. Bu haqda Ichki ishlar vazirligi axborot xizmati xabar qildi.
Xabarga ko‘ra, 2020-yilning 22-may kuni Samarqand shahar Ichki ishlar organlari faoliyatini muvofiqlashtirish bo‘limi huzuridagi tergov bo‘limidan firibgarlik holati qayd etilgani haqidagi hujjatlar kelib tushgan. Ularga ko‘ra, 2019-yil avgust oyidan sentabr oyigacha bo‘lgan vaqt oralig‘ida Navoiy shox ko‘chasidagi uylarning birida yashovchi, nafaqaxo‘r X.X. uyida Urgut tumani “Uzum” mahallasida yashovchi Sh.X. va “Qo‘shmachit” mahallasida yashovchi M.M.ning o‘g‘li U. X.ni Avstraliya davlatiga ishlashga yuborishda yordam berishga va’da beradi. Firibgarlik yo‘li bilan Sh.X.dan 3 ming AQSh dollari hamda M. M.dan 3,5 ming AQSh dollarini olib, bergan va’dasini bajarmay, pullarni o‘z ehtiyojlariga ishlatib yuborgan.
Ko‘rilgan tezkor choralar natijasida X.X. huquq-tartibot idoralari xodimlari tomonidan ushlangan.
21-may kuni X.X.ga nisbatan O‘zbekiston Respublikasi Jinoyat kodeksining 168-moddasi 3-qismiga (Firibgarlik) asosan jinoyat ishi qo‘zg‘atilgan. Tergov Samarqand ichki ishlar bo‘limi tomonidan olib borilmoqda, deyilgan xabarda.
Mavzuga doir:
- Bekobodda bozor nazoratchisidan ming dollar talab qilgan tovlamachi bloger qo‘lga tushdi
- Olmaliqda 2 nafar fuqaroni ishga olib kirishni va’da qilib, ulardan 3 ming AQSh dollari talab qilgan firibgar qo‘lga tushdi
- Namanganda soxta DXX xodimlarining bir fuqaroni qo‘rqitib 150 ming dollar pulni olib qo‘ygani fosh bo‘ldi (video)
Izoh (0)