O‘zbekiston va Rossiya o‘rtasidagi aviaqatnovlar soni haftasiga 1000 taga yetkaziladi

O‘zbekiston va Rossiya o‘rtasidagi aviaqatnovlar soni uch barobarga oshirilib, haftasiga mingtaga yetkazish bo‘yicha kelishuvga erishildi. Bu haqda O‘zbekiston Transport vazirligi matbuot xizmati xabar berdi.

2025-yilning 21-22-iyul kunlari kunlari Moskva shahrida ikki mamlakat aviatsiya hukumatlari o‘rtasida havo qatnovlarini rivojlantirish bo‘yicha muzokaralar o‘tkazildi.

Muzokaralar natijasiga ko‘ra quyidagi kelishuvlarga erishildi:

Xususan, har bir mamlakat tayinlangan aviakompaniyalari tomonidan haftasiga

• Toshkent—Moskva yo‘nalishida 50 tadan (jami 100 ta);
• Samarqand—Moskva yo‘nalishida 23 tadan (jami 46 ta);
• Buxoro—Moskva, Urganch—Moskva, Farg‘ona—Moskva, Namangan—Moskva yo‘nalishlarida 14 tadan (jami 112 ta);
• Toshkent—Sankt Peterburg, Toshkent—Krasnoyarsk, Toshkent—Sochi yo‘nalishlarida 14 tadan (jami 42 ta);
• Termiz—Moskva yo‘nalishida 10 tadan (jami 20 ta);
• boshqa barcha shaharlar yo‘nalishlarida 7 tadan, yaʼni Rossiya aviatashuvchilari uchun ularning 80 ta xalqaro aeroportidan O‘zbekistonning barcha xalqaro aeroportlariga jami 560 ta, O‘zbekiston aviatashuvchilari uchun O‘zbekistonning barcha xalqaro aeroportlaridan yuqorida qayd etilganidan tashqari Rossiyaning eng yirik 29 ta xalqaro aeroportlariga jami 203 ta aviaqatnovni amalga oshirish huquqini berish;
• shuningdek, aviaqatnovlarni amalga oshirish chog‘ida 3 ta parvoz manzilini o‘zida birlashtiruvchi “uchburchak” shakldagi qatnovlarni amalga oshirish doirasida aviakompaniyalar soni bo‘yicha cheklovlarni bekor qilib, har bir kompaniyaga 5 tagacha shaharni tanlash huquqini berish.

Mazkur kelishuv doirasida har ikki mamlakat aviakompaniyalari barcha parvoz shaharlaridan samarali foydalangan holda haftasiga 1000 dan ortiq qatnovni amalga oshirish huquqiga ega bo‘ldi, ayni vaqtda ikki mamlakat o‘rtasida haftasiga jami 310 dan ortiq muntazam aviaqatnov bajarilmoqda.

Ta’kidlanishicha, erishilgan kelishuv yo‘lovchi va yuk tashish hajmini oshirish bilan birga, ikki davlat o‘rtasida turistlarning erkin harakatlanishi uchun barcha imkoniyatlarni yaratgan holda ikki tomonlama savdo-iqtisodiy munosabatlarning yanada rivojlanishiga xizmat qiladi.

Rossiyadagi o‘zbekistonliklar soni

Prezident matbuot kotibi Sherzod Asadov 2024-yilning iyun oyida Rossiyadagi o‘zbekistonliklar soni 1 million nafarni tashkil etishini ma’lum qilgandi.

Statistik ma’lumotlarga qaraganda, 2016-yilgacha 4 milliondan ortiq O‘zbekiston fuqarolari Rossiyada mehnat faoliyati bilan shug‘ullangan.

“Bu degani agar 2016-yilgacha eng kam statistikani, ya’ni 4 millionni oladigan bo‘lsak ham, kamida 3 million muhojirimiz yurtimizga qaytdi. Mana shu ko‘rsatkichning o‘zi ham mamlakatimizda amalga oshirilayotgan iqtisodiy islohotlar samarasini ko‘rsatadi, deb bilaman”, dedi Asadov.

2025-yil iyun oyida Vladimir Putin Rossiya va O‘zbekiston migratsiya masalalarini birgalikda hal qilishga, muhojirlarni oldindan tayyorlashga kelishib olganini  aytib o‘tgandi.