Shahrisabzda Amir Temur sharafiga bunyod etilgan Ko‘k gumbaz masjidi devori o‘pirilib tushdi. Majmua 2016-yil qayta ta’mirlangandi
Qashqadaryo viloyatining Shahrisabz shahrida Mirzo Ulug‘bek tomonidan Amir Temur sharafiga qurilgan Ko‘k gumbaz masjidining devori o‘pirilib tushgan. Bu haqda “Daryo” o‘quvchilaridan biri xabar berdi.
Ma’lum qilinishicha, mazkur voqeaga ikki-uch kun bo‘lgan. Ammo mas’ullar haligacha bunga e’tibor qaratmagan.
Ko‘k gumbaz masjidi “Dor ut-tilovat” majmuasi tarkibida bo‘lib, 2016-yil qayta ta’mirlangan.
Qayd etilishicha, mazkur yodgorlik Mirzo Ulug‘bek tomonidan 1434—1435-yillarda qurilgan. Mirzo Ulug‘bek Ko‘k gumbaz masjidini otasi Shohrux nomidan bobosi Amir Temur sharafiga bunyod etgan. Kirish peshtoqining ravog‘ida ularning nomlari va qurilish vaqti yozilgan. Shuningdek, unda jome masjid ekanligi, haftaning har juma kuni bu yerda namoz o‘qilishi ta’kidlangan.
“Masjid gumbazi ikki qavat bo‘lib, diametrining kattaligi jihatidan O‘rta Osiyoda birinchi o‘rinda turadi. Peshtoqining old tomonida ham geometrik serjilo bezaklar ko‘p ishlatilgan va ularda ‘Alloh’, ‘Muhammad’ va ‘mulk Allohnikidir’ kabi so‘zlar bitilgan”, — deydi “Daryo” o‘quvchisi.
Mavzuga doir: Shavkat Mirziyoyev Shahrisabz shahrining tarixiy markazida joylashgan “Dorut-tilovat” majmuasini ziyorat qildi
