Zarafshon shahrida epidemiologik vaziyat o‘rganildi. Sel toshqinidan jabr ko‘rgan aholiga yordam ko‘rsatildi

Navoiy viloyati sektor rahbarlari viloyat IIB, tuman hokimliklari, DXX, FVB hamda Milliy gvardiya vakillari 13-may kuni sel toshqini yuz berishi oqibatida talafot ko‘rgan aholiga moddiy ko‘mak berdi. Bu haqda Navoiy viloyati hokimligi axborot xizmati xabar qilgan.

Xabarga ko‘ra, Navoiy viloyati barcha sektor rahbarlari ishtirokida shahardagi vaziyat va aholining ayni paytdagi ijtimoiy-iqtisodiy hayoti o‘rganib chiqilgan va fuqarolarning mavjud muammolari, kamchiliklar bartaraf etilgan.

“Kam ta’minlangan, ijtimoiy himoyaga muhtoj, boquvchisini yo‘qotgan oilalar holidan xabar olinib, bir oyga yetadigan oziq-ovqat mahsulotlari va dori-darmon vositalari ulashildi. Sektor rahbarlari kuchli sel toshqini natijasida yashash xonadoniga jiddiy zarar yetgan fuqarolar bilan uchrashdi. Uchrashuvda tez fursatlarda ularning uy-joylari qayta ta’mirlanib, aholining barcha kamchiliklari bartaraf etilishi xususida alohida ta’kidlab o‘tildi”, – deyilgan xabarda.

Shuningdek, sektor rahbarlari shahardagi epidemiologik vaziyatni ham o‘rgangan, hududda nazoratni yanada kuchaytirish, fuqarolar salomatligini asrab-avaylash chora-tadbirlari belgilangan. “Qizil” hudud bo‘lgan shahar bo‘ylab barcha bozorlar faoliyati to‘xtatilgan, 14 yo‘nalishda 14 ta ko‘chma bozor aholining ehtiyojlaridan kelib chiqqan holda uzluksiz oziq-ovqat mahsulotlari va dori-darmon vositalari bilan ta’minlanmoqda. Dezinfeksiya ishlari kuchaytirilgan tartibda yo‘lga qo‘yilgan holda, ko‘chalarda kun davomida ikki marotaba zararsizlantirish ishlari olib borilmoqda.