Qashqadaryo viloyat Favqulodda vaziyatlar boshqarmasi “Daryo”da e’lon qilingan maqolaga munosabat bildirib, Qizilchovra qishlog‘ida yashovchi Nargiza Boyjigitovaning gaplarini inkor qildi.
Ta’kidlash lozim, “Daryo”da e’lon qilingan maqolada joriy yil 8-may kuni kechki soat 20:00 da Qizilchovra qishlog‘iga kelgan sel 32 ta xonadonga zarar yetkazgani va 2 uy qulab tushgani ma’lum qilingandi.
“Daryo” muxbiri bilan suhbatlashgan Nargiza Boyjigitova esa Favqulodda vaziyatlar hamda Yong‘in xavfsizligi xodimlarini aholiga yordam berolmaslikda ayblagandi.
“Haqiqatan ham kuchli yomg‘ir oqibatida hosil bo‘lgan suv aholi yashash xonadonlarida yig‘ilib qolib, uylarga zarar etkazgan. Mazkur holatni bartaraf etish maqsadida, tuman Favqulodda vaziyatlar bo‘limi va tumanning mexanizatsiyalashtirilgan otryadlari kuch va vositalaridan jami olti dona suv tortishga mo‘ljallangan nasos, uchta qazuvchi ekskavator, bir dona yuklovchi (pogruzchik) va ikkita tashuvchi texnika, ikkita yong‘in-qutqaruv mashinasi hamda 22 nafar shaxsiy tarkib jalb qilingan. Shuningdek, mavjud holatni zudlik bilan bartaraf etish maqsadida Qamashi, Yakkabog‘ va Kitob tumani FVB bo‘limlarning kuch va vositalari yordamga olib kelingan”, — deyiladi boshqarma axborot xizmati munosabatida.
Viloyat favqulodda vaziyatlar boshqarmasi axborot xizmati rahbari Sohib Vaitovning aytishicha, aholi xonadonlarida yig‘ilib qolgan suvni betalafot yo‘naltirish maqsadida, qo‘shimcha 300 metr va fermer xo‘jaliklari dalasining qishloqqa tutash qismidan 620 metrdan ortiq ariq qazilib, aholi xonadonlaridagi suv mazkur ariq orqali chiqarib yuborilgan.
“Aholining yashash uylari oshxona, molxona va boshqa qo‘shimcha binolari 1990-yillarda poydevorsiz, paxsa loydan qurilganligi, paxsa devorining suv kirib namlanganligi, o‘zining tayanch nuqtasi va mustahkamligini yo‘qotganligi sababli qulab tushgan. Shuningdek, fermer xo‘jaliklarining ekin maydonlari er sathidan aholi yashash xonadonlariga nisbatan balandlikda joylashganligi sababli, qolaversa paynop, sel suvlarini yo‘naltirish uchun qazilgan ariqlar aholi tomonidan o‘zboshimchalik bilan yopib yuborilganligi suv yo‘nalishiga etarlicha ta’sir ko‘rsatgani uchun aholi xonadonlarida suv yig‘ilgan”, — deydi Sohib Vaitov.
Izoh (0)