Қашқадарё вилоят Фавқулодда вазиятлар бошқармаси «Дарё»да эълон қилинган мақолага муносабат билдириб, Қизилчовра қишлоғида яшовчи Наргиза Бойжигитованинг гапларини инкор қилди.
Таъкидлаш лозим, «Дарё»да эълон қилинган мақолада жорий йил 8 май куни кечки соат 20:00 да Қизилчовра қишлоғига келган сел 32 та хонадонга зарар етказгани ва 2 уй қулаб тушгани маълум қилинганди.
«Дарё» мухбири билан суҳбатлашган Наргиза Бойжигитова эса Фавқулодда вазиятлар ҳамда Ёнғин хавфсизлиги ходимларини аҳолига ёрдам беролмасликда айблаганди.
«Ҳақиқатан ҳам кучли ёмғир оқибатида ҳосил бўлган сув аҳоли яшаш хонадонларида йиғилиб қолиб, уйларга зарар этказган. Мазкур ҳолатни бартараф этиш мақсадида, туман Фавқулодда вазиятлар бўлими ва туманнинг механизациялаштирилган отрядлари куч ва воситаларидан жами олти дона сув тортишга мўлжалланган насос, учта қазувчи экскаватор, бир дона юкловчи (погрузчик) ва иккита ташувчи техника, иккита ёнғин-қутқарув машинаси ҳамда 22 нафар шахсий таркиб жалб қилинган. Шунингдек, мавжуд ҳолатни зудлик билан бартараф этиш мақсадида Қамаши, Яккабоғ ва Китоб тумани ФВБ бўлимларнинг куч ва воситалари ёрдамга олиб келинган», — дейилади бошқарма ахборот хизмати муносабатида.
Вилоят фавқулодда вазиятлар бошқармаси ахборот хизмати раҳбари Соҳиб Ваитовнинг айтишича, аҳоли хонадонларида йиғилиб қолган сувни беталафот йўналтириш мақсадида, қўшимча 300 метр ва фермер хўжаликлари даласининг қишлоққа туташ қисмидан 620 метрдан ортиқ ариқ қазилиб, аҳоли хонадонларидаги сув мазкур ариқ орқали чиқариб юборилган.
«Аҳолининг яшаш уйлари ошхона, молхона ва бошқа қўшимча бинолари 1990 йилларда пойдеворсиз, пахса лойдан қурилганлиги, пахса деворининг сув кириб намланганлиги, ўзининг таянч нуқтаси ва мустаҳкамлигини йўқотганлиги сабабли қулаб тушган. Шунингдек, фермер хўжаликларининг экин майдонлари эр сатҳидан аҳоли яшаш хонадонларига нисбатан баландликда жойлашганлиги сабабли, қолаверса пайноп, сел сувларини йўналтириш учун қазилган ариқлар аҳоли томонидан ўзбошимчалик билан ёпиб юборилганлиги сув йўналишига этарлича таъсир кўрсатгани учун аҳоли хонадонларида сув йиғилган», — дейди Соҳиб Ваитов.
Изоҳ (0)