Qozog‘istonda o‘tgan bir sutka ichida koronavirus bilan kasallanish bo‘yicha 161 ta holat qayd etildi. Bu haqda davlat komissiyasi tezkor shtabiga tayanib, Tengrinews xabar berdi.
Mamlakatda COVID-19 koronavirus infeksiyasi tarqalishi boshlanganidan buyon 5 850 kishida koronavirus aniqlangan, 34 kishi virus qurboniga aylangan, 2 707 nafar bemor sog‘aygan.
Kasallanish bo‘yicha eng ko‘p — 1 119 ta holat mamlakat poytaxti Nur-Sultonda qayd etilgan. So‘nggi sutkada mamlakat bo‘yicha aniqlangan kasallanishlarning eng ko‘pi — 26 ta holat ham aynan shu shaharga to‘g‘ri kelmoqda.
Qozog‘istonda koronavirusga chalinganlar 15-may kuni 118 nafarga, 14-may kuni 154 nafarga oshgandi.
Qirg‘izistonda esa koronavirusga chalinganlar so‘nggi bir sutka ichida 6 kishiga oshib, 1 117 nafarga yetdi, deb xabar bermoqda “Kloop”.Qayd etilishicha, jami kasallanganlarning 248 nafari tibbiyot xodimi bo‘lib, ayni paytda ularning 200 nafari sog‘aygan. Shuningdek, o‘tgan bir sutka ichida 38 nafar bemor koronavirusdan tuzalgan, vafot etish holatlari qayd etilmagan.
Shunday qilib, mamlakatda kasallanganlarning umumiy soni 1117 kishiga yetdi, bemorlarning 783 nafari tuzaldi, 14 nafari vafot etdi.
Izoh (0)