O‘zbekiston Prezidenti Shavkat Mirziyoyev “2020—2025-yillarga mo‘ljallangan O‘zbekiston Respublikasining bank tizimini isloh qilish strategiyasi to‘g‘risida”gi farmonni imzoladi.
Mazkur farmonga asosan, 2020—2025-yillarga mo‘ljallangan O‘zbekiston bank tizimini isloh qilish strategiyasi hamda O‘zbekiston bank tizimini isloh qilish bo‘yicha “Yo‘l xaritasi” tasdiqlandi.
Farmonga muvofiq, xalqaro moliya institutlari ko‘magida “Ipoteka bank”, “O‘zsanoatqurilishbank”, “Asakabank”, “Aloqabank”, “Qishloqqurilishbank” va “Turonbank” dagi davlat ulushlari bosqichma-bosqich xususiylashtiriladi. Bunda birinchi bosqichda ularni institutsional o‘zgartirish (faoliyatini transformatsiya qilish) amalga oshiriladi, ikkinchi bosqichda esa davlat aksiyalari paketi sotiladi.
Bank tizimini isloh qilish davrida aholining moliyaviy xizmatlarga bo‘lgan talabini qondirish, investitsiya loyihalarini qo‘llab-quvvatlash mexanizmini (“loyihalar fabrikasi”) keng joriy qilish, bank xizmatlarining hududiy qamrovini ta’minlash maqsadida “Tashqi iqtisodiy faoliyat Milliy banki”, “Agrobank” va “Mikrokreditbank” ustav kapitallarida davlat ulushi saqlab qolinadi.
O‘zbekiston Respublikasi Moliya vazirligi huzurida davlat ulushiga ega tijorat banklarini transformatsiya qilish va xususiylashtirish bo‘yicha Loyiha ofisi tashkil etiladi. Loyiha ofisi tijorat banklarini transformatsiya qilish va xususiylashtirish jarayonlariga maslahatchi sifatida xalqaro konsultantlarni jalb qiladi hamda bu ishlarga doir masalalarda xalqaro moliya institutlari va salohiyatli xorijiy investorlar bilan muzokaralar olib boradi va bitimlar tuzadi. Loyiha ofisiga moliya vazirining birinchi o‘rinbosari rahbarlik qiladi.
Strategiyani amalga oshirish quyidagi ko‘rsatkichlarga erishishni ko‘zda tutadi:
- bank tizimi aktivlarining jami hajmida davlat ulushi bo‘lmagan banklar aktivlari hissasini joriy 15 foizdan 2025-yilga kelib 60 foizgacha oshirish;
- banklar majburiyatlarining umumiy hajmida xususiy sektor oldidagi majburiyatlar hissasini joriy 28 foizdan 2025-yil yakuniga 70 foizgacha oshirish;
- 2025-yilga kelib davlat ulushi mavjud kamida uchta bank kapitaliga zarur tajriba, bilim va nufuzga ega kamida uchta strategik xorijiy investorni jalb qilish;
- umumiy kreditlash hajmida nobank kredit tashkilotlari ulushini joriy 0,35 foizdan 2025-yilga kelib 4 foizgacha oshirish.
Izoh (0)