Шавкат Мирзиёев Ўзбекистон банк тизимини ислоҳ қилиш стратегиясини тасдиқлади

Ўзбекистон Президенти Шавкат Мирзиёев «2020—2025 йилларга мўлжалланган Ўзбекистон Республикасининг банк тизимини ислоҳ қилиш стратегияси тўғрисида»ги фармонни имзолади.

Мазкур фармонга асосан, 2020—2025 йилларга мўлжалланган Ўзбекистон банк тизимини ислоҳ қилиш стратегияси ҳамда Ўзбекистон банк тизимини ислоҳ қилиш бўйича «Йўл харитаси» тасдиқланди.

Фармонга мувофиқ, халқаро молия институтлари кўмагида «Ипотека банк», «Ўзсаноатқурилишбанк», «Асакабанк», «Алоқабанк», «Қишлоққурилишбанк» ва «Туронбанк» даги давлат улушлари босқичма-босқич хусусийлаштирилади. Бунда биринчи босқичда уларни институционал ўзгартириш (фаолиятини трансформация қилиш) амалга оширилади, иккинчи босқичда эса давлат акциялари пакети сотилади.

Банк тизимини ислоҳ қилиш даврида аҳолининг молиявий хизматларга бўлган талабини қондириш, инвестиция лойиҳаларини қўллаб-қувватлаш механизмини («лойиҳалар фабрикаси») кенг жорий қилиш, банк хизматларининг ҳудудий қамровини таъминлаш мақсадида «Ташқи иқтисодий фаолият Миллий банки», «Агробанк» ва «Микрокредитбанк» устав капиталларида давлат улуши сақлаб қолинади.

Ўзбекистон Республикаси Молия вазирлиги ҳузурида давлат улушига эга тижорат банкларини трансформация қилиш ва хусусийлаштириш бўйича Лойиҳа офиси ташкил этилади. Лойиҳа офиси тижорат банкларини трансформация қилиш ва хусусийлаштириш жараёнларига маслаҳатчи сифатида халқаро консультантларни жалб қилади ҳамда бу ишларга доир масалаларда халқаро молия институтлари ва салоҳиятли хорижий инвесторлар билан музокаралар олиб боради ва битимлар тузади. Лойиҳа офисига молия вазирининг биринчи ўринбосари раҳбарлик қилади.

Стратегияни амалга ошириш қуйидаги кўрсаткичларга эришишни кўзда тутади:

• банк тизими активларининг жами ҳажмида давлат улуши бўлмаган банклар активлари ҳиссасини жорий 15 фоиздан 2025 йилга келиб 60 фоизгача ошириш;
• банклар мажбуриятларининг умумий ҳажмида хусусий сектор олдидаги мажбуриятлар ҳиссасини жорий 28 фоиздан 2025 йил якунига 70 фоизгача ошириш;
• 2025 йилга келиб давлат улуши мавжуд камида учта банк капиталига зарур тажриба, билим ва нуфузга эга камида учта стратегик хорижий инвесторни жалб қилиш;
• умумий кредитлаш ҳажмида нобанк кредит ташкилотлари улушини жорий 0,35 фоиздан 2025 йилга келиб 4 фоизгача ошириш.