Samarqand viloyatida Markaziy harbiy okrug qo‘mondonligi va viloyat hokimligi tomonidan Samarqand, Jizzax hamda Navoiy viloyatlarida istiqomat qilayotgan keksa avlod vakillariga pul mukofoti, medal hamda esdalik sovg‘alar topshirildi. Bu haqda harbiy jurnalist G‘ayrat Madrahimov “Daryo”ga ma’lum qildi.
Harbiylar Samarqand viloyati Nurobod tumanida 2 nafar urush qatnashchisi 100 yoshga to‘lgan Rahmon ota va Boyquvvat bobo bilan uchrashib, ular bilan suhbat qilgan.
Sazagan tumani Egriyo‘l qishlog‘ida istiqomat qilayotgan Rahmon ota Abilov Qur’oni karim oyatlarini ko‘zoynaksiz o‘qishi haqida so‘zlab berdi. Tim qishlog‘idagi Boyquvvat bobo esa harbiylarga “UAZ-469” da sayr qilish istagi borligini bildirdi. Boboni uyidan shunday mashinada urushga olib ketishgan ekan, deb yozadi G‘ayrat Madrahimov.
Hikoya qilinishicha, 1942—1944-yillarda 137-sonli motoo‘qchi polkida dushmanga qarshi kurashgan Rahmon ota Abilov 82 millimetrli minomyotdan otilgan yondiruvchi snaryad oskolkalaridan jarohatlangan. Gospitalda 6 oy davolanganidan so‘ng, bir umrga nogiron bo‘lib qolgan urush qatnashchisi uyiga qaytib, texnikumga o‘qishga kirgan.
Keyinchalik qishloqda 9-umumta’lim maktabini tashkil etib, bu yerda bolalarni 4-sinfgacha o‘qitishni boshlagan. Otaxondan uzoq umr ko‘rishning siri nimada ekani haqida so‘ralganda “Amali to‘g‘ri va adolatli insonlarga o‘lim yo‘q ekan”, deya javob qaytardi.
Urush faxriysi 40 yil avval turmush o‘rtog‘ini yo‘qotgan. Suhbat chog‘ida Rahmon ota harbiy xizmatchilarga Maxtumquli she’rlaridan o‘qib berdi.
Harbiy xizmatchilar yana bir urush qatnashchisi Boyquvvat bobo Sadinovni “UAZ” mashinasida O‘zbekistondagi eng katta poligon — “Kattaqo‘rg‘on” dala-o‘quv maydoni bo‘ylab, sayohatga olib chiqdi.
Izoh (0)