Самарқанд вилоятида Марказий ҳарбий округ қўмондонлиги ва вилоят ҳокимлиги томонидан Самарқанд, Жиззах ҳамда Навоий вилоятларида истиқомат қилаётган кекса авлод вакилларига пул мукофоти, медаль ҳамда эсдалик совғалар топширилди. Бу ҳақда ҳарбий журналист Ғайрат Мадраҳимов «Дарё»га маълум қилди.
Ҳарбийлар Самарқанд вилояти Нуробод туманида 2 нафар уруш қатнашчиси 100 ёшга тўлган Раҳмон ота ва Бойқувват бобо билан учрашиб, улар билан суҳбат қилган.
Сазаган тумани Эгрийўл қишлоғида истиқомат қилаётган Раҳмон ота Абилов Қуръони карим оятларини кўзойнаксиз ўқиши ҳақида сўзлаб берди. Тим қишлоғидаги Бойқувват бобо эса ҳарбийларга «УАЗ-469» да сайр қилиш истаги борлигини билдирди. Бобони уйидан шундай машинада урушга олиб кетишган экан, деб ёзади Ғайрат Мадраҳимов.
Ҳикоя қилинишича, 1942—1944 йилларда 137-сонли мотоўқчи полкида душманга қарши курашган Раҳмон ота Абилов 82 миллиметрли миномётдан отилган ёндирувчи снаряд осколкаларидан жароҳатланган. Госпиталда 6 ой даволанганидан сўнг, бир умрга ногирон бўлиб қолган уруш қатнашчиси уйига қайтиб, техникумга ўқишга кирган.
Кейинчалик қишлоқда 9-умумтаълим мактабини ташкил этиб, бу ерда болаларни 4-синфгача ўқитишни бошлаган. Отахондан узоқ умр кўришнинг сири нимада экани ҳақида сўралганда «Амали тўғри ва адолатли инсонларга ўлим йўқ экан», дея жавоб қайтарди.
Уруш фахрийси 40 йил аввал турмуш ўртоғини йўқотган. Суҳбат чоғида Раҳмон ота ҳарбий хизматчиларга Махтумқули шеърларидан ўқиб берди.
Ҳарбий хизматчилар яна бир уруш қатнашчиси Бойқувват бобо Садиновни «УАЗ» машинасида Ўзбекистондаги энг катта полигон — «Каттақўрғон» дала-ўқув майдони бўйлаб, саёҳатга олиб чиқди.
Изоҳ (0)