O‘zbekistonda “qizil”, “sariq” va “yashil” toifaga ajratilgan tuman va shaharlar ro‘yxati e’lon qilindi

Respublika maxsus komissiyasining qarori asosida 11-maydan “qizil”, “sariq” va “yashil” hududlarga ajratilgan tuman va shaharlar haqida ma’lumot berildi.

7-may, payshanba kuni o‘tkazilgan videoselektor yig‘ilishida Shavkat Mirziyoyev tomonidan O‘zbekistonda koronavirus bilan bog‘liq vaziyat yaxshilanib, ijobiy tomonga o‘zgarib borishi bilan hududlarni toifaga ajratishni tuman va shaharlar darajasida belgilash ta’kidlangandi.

Shu munosabat bilan, Respublika maxsus komissiyasining 2020-yil 8-maydagi yig‘ilishi bayoniga muvofiq, mamlakatda koronavirus infeksiyasi tarqalish holatining hududlar kesimidagi tahlili, kasallik aniqlangan bemorlarning davolanish (sog‘ayish) dinamikasi holatidan kelib chiqqan holda respublika hududlari 2020-yilning 11-mayidan e’tiboran tuman va shaharlar darajasida toifalarga ajratiladi.

Bunda:

• “sariq” va “qizil” toifadagi viloyatlarda koronavirus infeksiyasi umuman aniqlanmagan tuman (shahar)lar “yashil” toifaga kiritiladi;
• “yashil” yoki “sariq” toifadagi viloyatning biror-bir tumani (shahri)da koronavirus infeksiyasi aniqlanadigan bo‘lsa, butun viloyatning toifasini o‘zgartirmagan holda tegishli tuman (shahar)ning o‘zi “qizil” toifaga o‘tkaziladi.

Sanitariya-epidemiologik osoyishtalik agentligi koronavirus infeksiyasi tarqalish holatining har bir tuman (shahar) kesimidagi tahlili, kasallik aniqlangan bemorlarning davolanish (sog‘ayish) dinamikasi holatidan kelib chiqqan holda tuman (shahar)larning toifasini o‘zgartirish yuzasidan doimiy ravishda Qoraqalpog‘iston Respublikasi Vazirlar Kengashi va viloyatlar hokimliklariga taklif kiritib boradi.