Qashqadaryo viloyatining G‘uzor tumanidagi “Amir Temur” mahallasida yashovchi fuqarolar foydalanishga topshirilganiga ikki yil ham bo‘lmagan namunali uylarning yaroqsizligidan shikoyat qildi.
Aholi murojaatini o‘rgangan “Daryo” muxbiri Otabek Qo‘ldoshevning ma’lumot berishicha, 2018-yil foydalanishga topshirilgan namunali uylarning aksariyatida suv jo‘mraklari ishlamaydi. Xonadon eshiklariga o‘rnatilgan qulf nosoz yoki ishdan chiqqan. Uy devorlari esa mog‘orlab, to‘kilib tushmoqda.
“Yangi uyga 2019-yil mart oyida ko‘chib kirgan bo‘lsak, bir yilda ko‘plab kamchiliklari ko‘zga tashlanib qoldi. Yuvinish xonasi uchun o‘rnatilgan suv jo‘mraklari ishlamaydi. Oshxona devorlari mog‘orlab, o‘yilib tushmoqda. Xona eshiklari qulflanmaydi. Ba’zilarining qulfi buzuq bo‘lsa, ba’zi eshiklar noto‘g‘ri o‘rnatilgani bois qulflanmaydi”, — deydi namunali uylarda yashovchi Zarina Umirova.
Zarina Umirovaning ma’lumot berishicha, ular yashayotgan uy 2018-yil foydalanishga topshirilgan bo‘lsa-da, oila 2019-yil mart oyida uyga ko‘chib o‘tgan.
“Yomg‘ir yog‘sa, deraza tagidan suv kirib uyimiz suvga to‘ladi. Qurilish tashkiloti rahbariga murojaat qilaverib charchadik. ‘Bugun tuzatamiz, ertaga tuzatamiz’, deyishdan nariga o‘tmaydi. Shu yil qishda juda qiynaldik. ‘Otopleniyeni’ ulaylik desak, issiqlik tizimi yaxshi o‘rnatilmagani uchun uyni suv bosib ketadi. Keyin elektr pech ham ishlatolmaymiz. Shu sabab ham farzandim qishda qayta-qayta shamolladi. Quruvchi esa bu haqda o‘ylab ham ko‘rmaydi”, — deydi Zarina Umirova.
Hududdagi arzonlashtirilgan uylar buyurtmachisi “Qishloqqurilishinvest”ning tumanga biriktirilgan mutaxassisi Suyun Boymurodovning gapiga ko‘ra, aholi uchun qurilgan uylardagi eshik va deraza romlarining sifatsizligi quruvchi va buyurtmachiga bog‘liq emas.
“Deraza va eshik romlari bizga Toshkent shahridan keladi. Tenderda kim yutib olsa, o‘sha ta’minotchi olib keladi. Ularning sifati uchun biz javob bermaymiz. Bizning quruvchilar eshik va deraza romlariga o‘zgartirish kiritmaydi. Borini o‘rnatib beradi”, — deydi Suyun Boymurodov.
“Daryo” muxbiri bilan suhbatlashgan aholi vakillarining aytishicha, mazkur mahallada 2017, 2018 va 2019-yillarda ko‘plab namunali turar joylar qurilgan.
“Uch yil davomida ketma-ket qurilgan namunali uy-joylarning 2018-yil quruvchi Azamat Toshonov rahbarligida qurilganlari umuman sifatsiz. Talabga javob bermaydi”, — deydi shu uylarda yashovchi Lobar Annayeva. — Ammo 2017-yil quruvchi Mamayusuf Eshboboyev tomonidan qurilgan uylar sifatli. Shu kunga qadar biror-bir muammo kuzatilmagan”
Shu mahalladan 2019-yil yangi uy xarid qilib, ko‘chib kirgan Lobar Tursunovaning ma’lum berishicha, u sotib olgan uy ham sifatsiz qurilgan.
“Sotib olgan uyimizga 2019-yil bahor oyida ko‘chib kirishimiz kerak edi. Ammo uyning kamchiligi aniqlangach, ko‘chib o‘tmadik va ta’mirlab berishganidan so‘ng 2019-yil sentabr oyida uyga kirdik”, — deydi Lobar Tursunova.
Lobar Tursunovaning aytishicha, unga tegishli uyning mehmonxona devori tekshirib ko‘rilganda g‘ishtdan so‘ng sement ishlatilmagani, devorga qumsuvoqdan keyin pardozlash ishlari bajarilgani ma’lum bo‘lgan.
“Devor qumsuvoqligicha qolgani va sement ishlatilmagani aniqlangach, quruvchiga shikoyat qildim va ko‘chib kirishdan bosh tortdim. Hatto Prezident portaliga ham murojaat qildim. Shundan so‘ng kelib, kamchilikni to‘g‘irlab berishdi”, — deydi Lobar Tursunova. — Ammo haligacha uy qurilishidagi kamchiliklar tugagani yo‘q”
2018-yil mart oyida uy xarid qilgan Sirojiddin Qarshiyevning aytishicha, uyning nafaqat xonalarida, hatto tom qismida ham muammo bor.
“Tomga chiqib ko‘rganimizda shifer tagida yetarli darajada yog‘och ishlatilmagani ma’lum bo‘ldi. Bu kamchilik haqida qurilish tashkiloti rahbariga shikoyat qildik. Kelib tuzatib ketishdi”, — deydi xonadon vakillari.
Ushbu uylarni qurgan qurilish tashkiloti “Namuna Sabrina maxsus servis” xususiy korxonasi rahbari Azamat Toshonovning tan olishicha, yuqorida tilga olingan kamchiliklarning aksariyati bartaraf etilgan.
“Kamchiligi bor uylarning barcha muammolarini bartaraf etib, to‘g‘irlab berganmiz. Agarda yana muammolari bo‘lsa, biz to‘g‘irlab beramiz”, — deydi Azamat Toshonov.
Azamat Toshonovning ma’lumot berishicha, uning rahbarligidagi qurilish tashkiloti ushbu hududda 2017-yil 5 ta, 2018-yil 5 ta — jami 10 ta uy qurgan.
“Ba’zi xonadon egalari uyning ta’miridan ko‘ngli to‘lmay o‘zlari usta olib kelishdi. Kamchiligimiz bo‘lgan bo‘lsa, tan olib qurilish materiallarini berdik, hatto ustalarining xizmat haqini ham to‘ladik. Imkon qadar hech kimni norozi qilmaslikka harakat qilyapmiz”, — deydi quruvchi tashkilot rahbari.
Aholining qo‘shimcha qilishicha, hududda elektr toki ham muammo.
“Bir kun ‘svet’ bo‘lsa, uch kun o‘chirib qo‘yishadi. Sababini so‘rasak, liniyada nosozlik kuzatilgan, deyishadi. Sal yomg‘ir yog‘sa ham bizda nosozlik yuzaga kelib, ikki-uch kunlab ‘svet’siz o‘tiramiz. Tuman elektr ta’minoti korxonasi rahbari Erkin Pardayevga qancha murojaat qilmaylik, foydasi yo‘q”, — deydi Lobar Annayeva.
Aniqlanishicha, ushbu namunali uyda yashovchilarning aksariyati o‘qituvchilar bo‘lib, elektr tokidagi uzilishlar onlayn mashg‘ulot olib borishda qiyinchilik tug‘dirmoqda.
“Shu uyga ko‘chib kelganimizdan beri elektr toki bir maromda berilganini eslolmayman, — deydi Lobar Tursunova. — Sal yomg‘ir yog‘sa yoki shamol bo‘lsa, ‘svet’siz qolamiz. Eng yomoni bu holat ikki-uch kunlab davom etadi. Tuman elektr ta’minoti rahbariga muammoni aytsak, eshitgisi kelmaydi. Navbatchiga qo‘ng‘iroq qilsak, telefonga javob bermaydi”
Ta’kidlanishicha, elektr tokidagi nosozliklar sabab televizorlar ham tez-tez kuyadi.
Bu holatni eshitgan tuman elektr ta’minoti korxonasi rahbari Erkin Pardayev tumanda ikki-uch kunlab elektr toki bo‘lmasligini inkor qildi.
“Buxoro va Sardobadagi voqealar sabab odamlar uysiz, ‘svet’siz yashayapti-ku. Nega bular nolishadi, tushunmayman. To‘g‘ri, oldin to‘rt-besh kunlab elektr tokini o‘chirib, tokni tejardik. Bugungi kunda bu holat yo‘q-ku. Har doim elektr toki bilan ta’minlashga harakat qilyapmiz”, — deydi Erkin Pardayev.
Erkin Pardayevning aytishicha, Buxoro viloyatidagi voqealarga sabab bo‘lgan kuchli shamol paytida tumanda ham nosozliklar kuzatilgan. Ammo undan keyin bunday holat yuz bermagan.
G‘uzorlik murojaatchilarning “Daryo” muxbiriga qo‘ng‘iroq qilib ma’lum qilishicha, namunali uylarda 8-may kuni ham soat 13:30 dan 17:30 gacha elektr toki bo‘lmagan. Soat 17:30 da yongan chiroq yomg‘ir yog‘ishi natijasida 20:15 da yana o‘chgan. Tuman elektr ta’minoti korxonasi navbatchisi esa tarmoq nosoz ekanligini takrorlab, aholiga bu tarmoqdan elektr toki berilishi noto‘g‘ri ekanligini qo‘shimcha qilgan.
Izoh (0)