Senatning to‘rtinchi yalpi majlisi 11-may kuni chaqiriladi

2020-yil 6-may kuni O‘zbekiston Respublikasi Oliy Majlis Senati Kengashining majlisi bo‘lib o‘tdi. Bu haqda Senatning axborot xizmati xabar qilgan.

Kengash majlisni Parlament yuqori palatasi raisi Tanzila Narboyeva ochib bergan senatorlar hamda mahalliy Kengashlar deputatlarining tashabbuskorligini yanada oshirish, xalqimiz turmushining yaxshilanishi yo‘lidagi har bir ezgu ishga yaqindan ko‘maklashishi zarurligi qayd etdi.

Majlisda O‘zbekiston Respublikasi Oliy Majlis Senatining to‘rtinchi yalpi majlisini 2020-yil 11-may kuni chaqirish to‘g‘risida qaror qabul qilindi.

Videokonferensaloqa shaklida o‘tkaziladigan yalpi majlisda 20 ta masala, jumladan, 10 ta qonun ko‘rib chiqilishi rejalashtirilgan.

“ ‘Salomatlik’ ordenini ta’sis etish to‘g‘risida”gi, “ ‘Sog‘lom turmush’ medalini ta’sis etish to‘g‘risida”gi, “ ‘Faxriy murabbiy’ ordenini ta’sis etish to‘g‘risida”gi yangi qonunlar shular jumlasidan.

Shu bilan birga, “ ‘2020-yil uchun O‘zbekiston Respublikasining Davlat budjeti to‘g‘risida’gi qonunga o‘zgartish va qo‘shimchalar kiritish haqidagi”gi, “ ‘Toshkent shahri va Toshkent viloyatida doimiy propiska qilinishi lozim bo‘lgan shaxslar – O‘zbekiston Respublikasi fuqarolari toifalarining ro‘yxati to‘g‘risida’gi qonunga o‘zgartish va qo‘shimchalar kiritish haqida”gi hujjatlar muhokama qilinadi.

Bundan tashqari, senatorlar O‘zbekiston Respublikasining Yevrosiyo iqtisodiy ittifoqi bilan hamkorligi to‘g‘risidagi masalani ham ko‘rib chiqadi.

Yalpi majlisda “Ilm, ma’rifat va raqamli iqtisodiyotni rivojlantirish yili” Davlat dasturining 2020-yil birinchi choragidagi ijrosi yuzasidan Vazirlar Mahkamasining, Ombudsman, Hisob palatasi, Bosh prokuror va Markaziy bank boshqaruvi raisining 2019-yildagi faoliyati to‘g‘risidagi hisobotlari eshitilishi ham nazarda tutilmoqda.

Yalpi majlis kun tartibiga hokimlar tomonidan qarorlar qabul qilinishida qonun hujjatlariga rioya etilishi holati yuzasidan hukumatga parlament so‘rovi yuborish masalasi kiritilgan.

“Iqtisodiyotni rivojlantirish va kambag‘allikni qisqartirishga oid davlat siyosatini tubdan yangilash chora-tadbirlari to‘g‘risida”gi Prezident farmonini tasdiqlash masalasi navbatdagi majlis kun tartibiga kiritiladi.

Kun tartibidagi masalalarga tayyorgarlikning borishi yuzasidan mas’ul qo‘mitalar raislarining tegishli axborotlari eshitilgan.

Shuningdek, parlament palatalari Kengashlarining “Dehqon xo‘jaliklari va tomorqa yer uchastkalaridan foydalanish samaradorligini yanada oshirishga doir chora-tadbirlar to‘g‘risida”gi qo‘shma qarori ijrosini ta’minlash bo‘yicha amalga oshirilgan ishlar ham muhokama qilingan.

Majlisda Kengash a’zolari O‘zbekiston Respublikasining Muqaddas Taxt huzuridagi favqulodda va muxtor elchisini ham tasdiqladi.