Bugun, 6-may kuni, O‘zbekiston Prezidenti Shavkat Mirziyoyev va Turkmaniston prezidenti Gurbanguli Berdimuhamedovning telefon orqali muloqoti bo‘lib o‘tdi, deb xabar bermoqda Prezident matbuot xizmati.
Suhbat chog‘ida O‘zbekiston—Turkmaniston munosabatlarining joriy holati va ularni kengaytirish istiqbollari muhokama qilingan. Shuningdek, O‘zbekistonda Sardoba suv omboridagi favqulodda vaziyat oqibatlarini bartaraf etish bilan bog‘liq masalalarga to‘xtalib o‘tilgan. Koronavirus infeksiyasining tarqalishi bilan bog‘liq epidemiologik vaziyat xususida ham fikr almashilgan.
Bundan tashqari, O‘zbekiston va Turkmaniston yetakchilari xalqaro siyosat va mintaqaviy hamkorlikka oid qator dolzarb masalalar ham ko‘rib chiqilgan.
Shavkat Mirziyoyev 2-may kuni Qozog‘iston prezidenti Qosim-Jo‘mart To‘qayev bilan telefon orqali bo‘lib o‘tgan muloqotda Sardoba suv omborida yuz bergan holatni muhokama qilgandi. Prezident So‘ronboy Jeenbekov bilan ham Sardobadagi favqulodda vaziyatni muhokama qilgan.
Eslatib o‘tamiz, Shavkat Mirziyoyev 5-may kuni bo‘lib o‘tgan videoselektor yig‘ilishida Sardobadagi falokatdan so‘ng to‘rt kishi halok bo‘lgani, bir kishi bedarak yo‘qolganini qayd etgan, hodisa aybdorlari, ular kim bo‘lishidan qat’i nazar, qonun oldida javob berishini alohida, ishontirib ta’kidlagandi. Shuningdek, jabr ko‘rganlarga yordam ko‘rsatayotgan o‘zbekistonliklarga minnatdorchilik bildirgan.
Izoh (0)