Сенатнинг тўртинчи ялпи мажлиси 11 май куни чақирилади

2020 йил 6 май куни Ўзбекистон Республикаси Олий Мажлис Сенати Кенгашининг мажлиси бўлиб ўтди. Бу ҳақда Сенатнинг ахборот хизмати хабар қилган.

Кенгаш мажлисни Парламент юқори палатаси раиси Танзила Нарбоева очиб берган сенаторлар ҳамда маҳаллий Кенгашлар депутатларининг ташаббускорлигини янада ошириш, халқимиз турмушининг яхшиланиши йўлидаги ҳар бир эзгу ишга яқиндан кўмаклашиши зарурлиги қайд этди.

Мажлисда Ўзбекистон Республикаси Олий Мажлис Сенатининг тўртинчи ялпи мажлисини 2020 йил 11 май куни чақириш тўғрисида қарор қабул қилинди.

Видеоконференцалоқа шаклида ўтказиладиган ялпи мажлисда 20 та масала, жумладан, 10 та қонун кўриб чиқилиши режалаштирилган.

« ‘Саломатлик’ орденини таъсис этиш тўғрисида»ги, « ‘Соғлом турмуш’ медалини таъсис этиш тўғрисида»ги, « ‘Фахрий мураббий’ орденини таъсис этиш тўғрисида»ги янги қонунлар шулар жумласидан.

Шу билан бирга, « ‘2020 йил учун Ўзбекистон Республикасининг Давлат бюджети тўғрисида»ги қонунга ўзгартиш ва қўшимчалар киритиш ҳақидаги»ги, « ‘Тошкент шаҳри ва Тошкент вилоятида доимий прописка қилиниши лозим бўлган шахслар – Ўзбекистон Республикаси фуқаролари тоифаларининг рўйхати тўғрисида»ги қонунга ўзгартиш ва қўшимчалар киритиш ҳақида»ги ҳужжатлар муҳокама қилинади.

Бундан ташқари, сенаторлар Ўзбекистон Республикасининг Евросиё иқтисодий иттифоқи билан ҳамкорлиги тўғрисидаги масалани ҳам кўриб чиқади.

Ялпи мажлисда «Илм, маърифат ва рақамли иқтисодиётни ривожлантириш йили» Давлат дастурининг 2020 йил биринчи чорагидаги ижроси юзасидан Вазирлар Маҳкамасининг, Омбудсман, Ҳисоб палатаси, Бош прокурор ва Марказий банк бошқаруви раисининг 2019 йилдаги фаолияти тўғрисидаги ҳисоботлари эшитилиши ҳам назарда тутилмоқда.

Ялпи мажлис кун тартибига ҳокимлар томонидан қарорлар қабул қилинишида қонун ҳужжатларига риоя этилиши ҳолати юзасидан ҳукуматга парламент сўрови юбориш масаласи киритилган.

«Иқтисодиётни ривожлантириш ва камбағалликни қисқартиришга оид давлат сиёсатини тубдан янгилаш чора-тадбирлари тўғрисида»ги Президент фармонини тасдиқлаш масаласи навбатдаги мажлис кун тартибига киритилади.

Кун тартибидаги масалаларга тайёргарликнинг бориши юзасидан масъул қўмиталар раисларининг тегишли ахборотлари эшитилган.

Шунингдек, парламент палаталари Кенгашларининг «Деҳқон хўжаликлари ва томорқа ер участкаларидан фойдаланиш самарадорлигини янада оширишга доир чора-тадбирлар тўғрисида»ги қўшма қарори ижросини таъминлаш бўйича амалга оширилган ишлар ҳам муҳокама қилинган.

Мажлисда Кенгаш аъзолари Ўзбекистон Республикасининг Муқаддас Тахт ҳузуридаги фавқулодда ва мухтор элчисини ҳам тасдиқлади.