Toshkent shahrining Olmazor tumanida 30-aprel kuni sodir bo‘lgan yo‘l-transport hodisasida 10 yoshli bola jarohat oldi. Bu haqda YHXBB xabar berdi.
Hodisa soat 16:00 larda Chig‘atoy va Oqtepa ko‘chalari kesishgan chorrahada ro‘y bergan. YHXBB tomonidan e’lon qilingan videoda Cobalt avtomobili asosiy yo‘ldan harakatlanayotgan mashinalarni qo‘yib yuborish uchun to‘xtagan. 10 yoshli piyoda O.A. Cobalt to‘xtaganini ko‘rgach, yo‘lni kesib o‘tish uchun harakatlanadi va u mashinaning orqa tomonidan emas, old tomonidan o‘tmoqchi bo‘ladi. Shu vaqtda Cobalt ham yuradi va piyodani ko‘rmasdan uni urib yuboradi.
Keyingi lavhalarda Cobalt yo‘lovchisi mashinadan tushib, jarohatlangan bolani ko‘tarib mashina saloniga o‘tqazgani va mashina qo‘zg‘alib ketganini ko‘rish mumkin. Cobalt haydovchisi esa mashinadan tushmaydi. YHXBB ma’lumotiga ko‘ra, Cobalt’ni 1979-yilda tug‘ilgan T.N. boshqarayotgan bo‘lgan. 10 yoshli O.A. esa shifoxonaga yotqizilgan.
Hodisa yuz bergan 30-aprel kuni O‘zbekistonda karantin cheklovlari yengillashtirilgan edi.
Jumladan:
- fuqarolarga — ish joyiga borib kelishi, tibbiy buyumlar, dori vositalari, oziq-ovqat va birinchi navbatda zarur bo‘lgan mahsulotlarni xarid qilish uchun soat 07:00 dan 10:00 ga hamda soat 17:00 dan 20:00 ga qadar barcha turdagi shaxsiy va xizmat yengil avtotransport vositalari (yo‘lovchilar bilan birga), shu jumladan, velosiped va mototransportlarda maxsus ruxsatnomasiz harakatlanishga;.
- fuqarolarga — shahar va tumanlardagi ko‘p qavatli uylarning bevosita oldida va ichki hovli hududlarida ijtimoiy masofani (oraliq masofa 2 metr) saqlagan va niqoblar taqilgan holda sayr qilishga, bunda 14 yoshgacha bo‘lgan bolalar ota-onalarining hamrohligida sayr qilishga ruxsat berilgan edi.
Izoh (0)