Тошкент шаҳрининг Олмазор туманида 30 апрель куни содир бўлган йўл-транспорт ҳодисасида 10 ёшли бола жароҳат олди. Бу ҳақда ЙҲХББ хабар берди.
Ҳодиса соат 16:00 ларда Чиғатой ва Оқтепа кўчалари кесишган чорраҳада рўй берган. ЙҲХББ томонидан эълон қилинган видеода Cobalt автомобили асосий йўлдан ҳаракатланаётган машиналарни қўйиб юбориш учун тўхтаган. 10 ёшли пиёда О.А. Cobalt тўхтаганини кўргач, йўлни кесиб ўтиш учун ҳаракатланади ва у машинанинг орқа томонидан эмас, олд томонидан ўтмоқчи бўлади. Шу вақтда Cobalt ҳам юради ва пиёдани кўрмасдан уни уриб юборади.
Кейинги лавҳаларда Cobalt йўловчиси машинадан тушиб, жароҳатланган болани кўтариб машина салонига ўтқазгани ва машина қўзғалиб кетганини кўриш мумкин. Cobalt ҳайдовчиси эса машинадан тушмайди. ЙҲХББ маълумотига кўра, Cobalt’ни 1979 йилда туғилган Т.Н. бошқараётган бўлган. 10 ёшли О.А. эса шифохонага ётқизилган.
Ҳодиса юз берган 30 апрель куни Ўзбекистонда карантин чекловлари енгиллаштирилган эди.
Жумладан:
- фуқароларга — иш жойига бориб келиши, тиббий буюмлар, дори воситалари, озиқ-овқат ва биринчи навбатда зарур бўлган маҳсулотларни харид қилиш учун соат 07:00 дан 10:00 га ҳамда соат 17:00 дан 20:00 га қадар барча турдаги шахсий ва хизмат енгил автотранспорт воситалари (йўловчилар билан бирга), шу жумладан, велосипед ва мототранспортларда махсус рухсатномасиз ҳаракатланишга;.
- фуқароларга — шаҳар ва туманлардаги кўп қаватли уйларнинг бевосита олдида ва ички ҳовли ҳудудларида ижтимоий масофани (оралиқ масофа 2 метр) сақлаган ва ниқоблар тақилган ҳолда сайр қилишга, бунда 14 ёшгача бўлган болалар ота-оналарининг ҳамроҳлигида сайр қилишга рухсат берилган эди.
Изоҳ (0)