Koronavirusga qarshi kurash uchun bog‘ida sayr qilib, 30 mln funt to‘plagan kapitan Tom Mur 100 yoshga to‘ldi. Uning uyi ustida havo paradi uyushtirildi

Buyuk Britaniyada koronavirusga qarshi kurashayotgan shifokorlar uchun bog‘ida sayr qilib, 30 million funt to‘plagan va You’ll never never walk alone qo‘shig‘iga kuylangan kaver bilan xit-paradda birinchi o‘rinni egallagan Ikkinchi jahon urushi faxriysi kapitan Tom Mur 30-aprel kuni 100 yoshga to‘ldi.

Meduza nashrining yozishicha, kapitan Tom Bedfordshir grafligidagi uyida tug‘ilgan kunini nishonlagan. U tug‘ilgan kunida minglab tabriklar va ajoyib sovg‘alar qabul qildi.

Kapitan Tomni tug‘ilgan kuni bilan qirolicha Yelizaveta II va mamlakat bosh vaziri Boris Jonson ham tabrikladi.

Tom Mur qirolichadan tashqari 140 ming kishidan otkritka oldi. Otkritkalar faxriyning tug‘ilgan kunidan bir necha kun oldin kela boshladi. Otkritkalarni kapitan Tomning nevarasi o‘qiydigan maktabning zaliga joylashtirib chiqishdi.

Kapitan Tom Xarrogeyt shahridagi harbiy kollejning faxriy polkovnigiga aylandi. U unvoni oshganidan xursand bo‘ldi: “Men hali ham kapitan Tomman, lekin kimdir meni polkovnik deb chaqirmoqchi bo‘lsa, katta rahmat deyman”.

Yangi unvon bilan birga u yo‘qotib qo‘ygan medali o‘rniga yangisini oldi. 1945-yilda ta’sis etilgan “Mudofaa uchun” medali Ikkinchi jahon urushi qatnashchilariga berilgan.

Veteranning tug‘ilgan kuni munosabati bilan haqiqiy havo paradi uyushtirildi. Kapitan Tomning uyi ustidan “Houker Harrikeyn” va “Spitfayr” qiruvchi samolyotlari uchib o‘tdi. Ushbu samolyotlar Ikkinchi jahon urushi yillari Qirollik HHKning asosiy qiruvchi samolyotlari bo‘lgan.

The amazing moment a Spitfire and Hurricane flew over @captaintommoore's house to mark his 100th birthday on #BBCBreakfast.#CaptainTom100
More here: https://t.co/1BAoxJgEVN pic.twitter.com/auFO4hbGbC

— BBC Breakfast (@BBCBreakfast) April 30, 2020

Buyuk Britaniya Qirollik pochtasi kapitan Tomning yubileyi munosabati bilan pochta tamg‘asi yaratdi. 1-maygacha barcha xatlarga aynan shu pochta tamg‘asi bosiladi.

Today we launch a very special postmark to celebrate Captain Thomas Moore's 100th Birthday!

The postmark will pay tribute to the work of the inspiring NHS fundraiser who has captured the hearts and minds of the nation in the midst of the ongoing crisis.#CaptainTomMoore 👏 pic.twitter.com/EGC9f8nfTw

— Royal Mail (@RoyalMail) April 27, 2020

Bundan tashqari, kapitan Tom kriket bo‘yicha Angliya terma jamoasining faxriy a’zosiga aylandi.

Ikkita poyezd veteran sharafiga nomlandi.

Kapitan Tomning o‘zi tug‘ilgan kuni arafasida Twitter’da quyidagicha post qoldirdi: “Mening 100 yoshga to‘lishim hayratlanarli. Lekin yanada hayratlanarlisi — men bu kunni ko‘plab tabriklar bilan qarshi olayotganim. Mening sayrimga odamlar bildirgan munosabatidan zavqlanyapman. Xayriya qilgan, otkritka va tabriklar yuborganlardan minnatdorman. Iltimos, uyingizda qoling, xavfsizlikda qoling. Ertaga yaxshi kun bo‘ladi”.