Koronavirusga chalingan qashqadaryolik 14 yoshli bemor ham sog‘ayib, reabilitatsiya markaziga kuzatildi. Bu haqda “Daryo”ga viloyat sog‘liqni saqlash boshqarmasi axborot xizmati rahbari Nuriddin Egamov ma’lum qildi.
Ta’kidlanishicha, chiroqchilik bemor Shamshod Suyunov viloyat yuqumli kasalliklar shifoxonasidan bugun, 28-aprel kuni, soat 10:00 da markazga kuzatilgan.
Viloyatda koronavirusga chalingan birinchi bemor sifatida qayd etilgan 14 yoshli Shamshod Suyunov joriy yil 28-mart kuni shifoxonaga yotqizilgan edi.
Eslatib o‘tamiz, u kasallikni Toshkent shahrida yashovchi 39 yoshli shifokor qarindoshidan yuqtirgani ma’lum qilingandi.
Shundan so‘ng, uning 36 yoshli otasi va 18 yoshli opasi xastalikka chalingani xabar berildi. Keyinchalik 16 yoshli opasi va 8 yoshli ukasida ham koronavirus aniqlandi.
Joriy yil 14-aprel kuni birinchi bemorning 8 yoshli ukasi kasallikdan sog‘aygan bo‘lsa, 24-aprel kuni ikki nafar opasi ham kasallikni “yengdi”. Hozirda bemorning otasi shifoxonada qolmoqda.
O‘zbekistonda 28-aprel soat 12:20 holatiga ko‘ra 1007 kishi koronavirusdan davolanmoqda.
Izoh (0)