Коронавирусга чалинган қашқадарёлик биринчи бемор ҳам соғайди

Коронавирусга чалинган қашқадарёлик 14 ёшли бемор ҳам соғайиб, реабилитация марказига кузатилди. Бу ҳақда «Дарё»га вилоят соғлиқни сақлаш бошқармаси ахборот хизмати раҳбари Нуриддин Эгамов маълум қилди.

Таъкидланишича, чироқчилик бемор Шамшод Суюнов вилоят юқумли касалликлар шифохонасидан бугун, 28 апрель куни, соат 10:00 да марказга кузатилган.

Вилоятда коронавирусга чалинган биринчи бемор сифатида қайд этилган 14 ёшли Шамшод Суюнов жорий йил 28 март куни шифохонага ётқизилган эди.

Эслатиб ўтамиз, у касалликни Тошкент шаҳрида яшовчи 39 ёшли шифокор қариндошидан юқтиргани маълум қилинганди.

Шундан сўнг, унинг 36 ёшли отаси ва 18 ёшли опаси хасталикка чалингани хабар берилди. Кейинчалик 16 ёшли опаси ва 8 ёшли укасида ҳам коронавирус аниқланди.

Жорий йил 14 апрель куни биринчи беморнинг 8 ёшли укаси касалликдан соғайган бўлса, 24 апрель куни икки нафар опаси ҳам касалликни «енгди». Ҳозирда беморнинг отаси шифохонада қолмоқда.

Ўзбекистонда 28 апрель соат 12:20 ҳолатига кўра 1007 киши коронавирусдан даволанмоқда.