Karantin tufayli ijara xonadoni bo‘shab qolgan uy egalari ko‘chmas mulk ijara shartnomasini vaqtincha bekor qilinganligi haqidagi kelishuvni hisobga qo‘yish uchun so‘rovnomani to‘ldirishi lozim. Bu haqda 24-aprel kuni AOKAda o‘tkazilgan brifingda Davlat soliq qo‘mitasi vakili Muzaffar Yusuf Nazarov ma’lumot berdi.
Qo‘mita vakilining ta’kidlashicha, ko‘chmas mulk ijara shartnomasi muddatidan oldin bekor bo‘lganda, ko‘chmas mulk ijara shartnomasini vaqtincha bekor qilinganligi haqida kelishuv ixtiyoriy shaklda tuziladi.
“Ijaraga beruvchi ko‘chmas mulk ijara shartnomasini vaqtincha bekor qilinganligi haqidagi kelishuvni davlat soliq xizmati organlarida hisobga qo‘yish uchun, o‘zining shaxsiy kabineti yoki Davlat soliq qo‘mitasining “my.soliq.uz” soliq xizmatlari portalidagi “Ijara shartnomalarini hisobga qo‘yish” interaktiv davlat xizmati orqali belgilangan shakldagi so‘rovnomani to‘ldirib, elektron tarzda yuboradi”, — dedi Muzaffar Yusuf Nazarov.
“So‘rovnomaga ko‘chmas mulk ijara shartnomasini vaqtincha bekor qilinganligi haqidagi kelishuv nusxasi biriktiriladi, shuningdek, kelishuv ikki tomonlama tasdiqlangan bo‘lishi kerak, chunki o‘rtada nizo kelib chiqishi mumkin va bunday holatlarda sud tartibida hal qilinadi”, — deya qo‘shimcha qildi boshqarma boshlig‘i o‘rinbosari.
Izoh (0)