Qashqadaryo viloyatining Yakkabog‘ tumanida yashovchi fuqarolar 1-fevraldan ov mavsumi to‘xtatilganiga qaramay, noqonuniy ravishda kaklik ovlab, tabiatga 2 million 676 ming so‘m zarar keltirdi. Bu haqda “Daryo”ga viloyat Ekologiya va atrof muhitni muhofaza qilish boshqarmasi axborot xizmati rahbari Karima Yodgorova ma’lum qildi.
Boshqarma xodimlari tomonidan 21-aprel kuni o‘tkazilgan tekshiruvda Yakkabog‘ tumanining Tatar va Turon qishloqlarida yashovchi uch fuqaro Qashqadaryo davlat o‘rmon xo‘jaligi Qiziltom o‘rmon bo‘limi “Zarmas” uchastkasida o‘zlariga tegishli 16 dona taqiqlangan tuzoq bilan 12 bosh kaklik ovlayotgan payt qo‘lga olingan.
12 kaklikning to‘rttasi tabiat qo‘yniga uchirib yuborilgan, qolganlari (nobud bo‘lgani) esa ashyoviy dalil sifatida olib qo‘yilgan. Tabiatga zarar keltirganlar ishi hujjatlashtirilib, sudga taqdim etilgan.
Izoh (0)