“Ular tagliklarda 12 soat uzluksiz ishlashga majbur”. Rossiyalik shifokor koronavirusni davolayotganlarning og‘ir sharoitlari haqida

Koronavirus bilan kasallangan odamlarni davolaydigan shifokorlar qiyin sharoitlarda ishlashga majbur bo‘lmoqda. Bu haqda “NSN” (Milliy axborot xizmati) bilan suhbatda professor, Rossiyada xizmat ko‘rsatgan shifokor Aleksandr Karabinenko ma’lum qilgan.

Mutaxassisning so‘zlariga ko‘ra, uning o‘zi yoshi katta (78 yosh) bo‘lgani uchun bemorlarni davolashda ishtirok etmayapti, ammo hamkasblari bilan gaplashib turadi.

“Ularning mehnat sharoitlari ham juda og‘ir, chunki tagliklarda kuniga 12 soat uzluksiz ishlashga to‘g‘ri keladi. Yeb-ichish ham yo‘q. Bu juda mashaqqatli ish”, — degan Karabinenko va buning uchun shifokorlarga munosib haq to‘lash kerakligini aytgan.

Shuningdek, Aleksandr Karabinenko koronavirus infeksiyasi tarqalishiga qarshi kurash choralarini to‘g‘ri deb hisoblaydi. “Odamlarni infeksiyaning tarqalishidan cheklash lozim”, — degan shifokor.