Italiyada karantin muddatining uzaytirilishi moda sanoati vakillarining noroziligiga sabab bo‘ldi. Bu haqda Harper’s Bazaar nashri xabar berdi.
Hukumatning mazkur qaroriga javob tariqasida moda palatasi va ushbu sanoat bilan bog‘liq boshqa uyushma vakillari norozilik ruhida ochiq xat yozdi va ushbu maktub La Repubblica gazetasida e’lon qilindi.
“Agar ishlab chiqarish 20-aprelga qadar tiklanmasa, iyul oyida butun dunyoga tarqatilishi kerak bo‘lgan, kuz-qish kolleksiyasini tayyorlashga ulgurilmaydi. Biz 2021-yil bahor kolleksiyasini tayyorlay olmaymiz. Kechikish sabab brendlar sentabr oyidagi namoyishlarga tayyorlana olmaydi”, — degan moda palatasi vakili Karlo Kapasi.
Shuningdek, u “Italiya moda sanoati nafaqat biz uchun, balki ushbu ajoyib mamlakatning kelajak avlodlari uchun saqlab qolinishi kerak”, — deya sanoat tomonidan tibbiyot xodimlari va bemorlar uchun qisqa vaqt ichida himoya niqobi va xalatlari saxovatpeshalik bilan ishlab chiqarilganini qo‘shimcha qilgan.
https://www.instagram.com/p/B-1_-zAIJ-5/?utm_source=ig_embed
Maktubda aytilishicha, Italiya Yevropa mamlakatlari orasida moda olamidagi eng yirik lyuks buyumlar, kiyim-kechak, poyabzal va aksessuarlar ishlab chiqarishda yetakchi hisoblanib, ushbu sanoatda 600 ming ishchi faoliyat yuritadi.
Kapasining murojaati “Mamlakat ramzi bo‘lgan sanoatni yo‘qotishga tayyormizmi?”, deya yakunlangan.
Izoh (0)