Италия мода саноати вакиллари мамлакатда карантин муддати узайтирилишига қарши чиқди

Италияда карантин муддатининг узайтирилиши мода саноати вакилларининг норозилигига сабаб бўлди. Бу ҳақда Harper’s Bazaar нашри хабар берди.

Ҳукуматнинг мазкур қарорига жавоб тариқасида мода палатаси ва ушбу саноат билан боғлиқ бошқа уюшма вакиллари норозилик руҳида очиқ хат ёзди ва ушбу мактуб La Repubblica газетасида эълон қилинди.

«Агар ишлаб чиқариш 20 апрелга қадар тикланмаса, июль ойида бутун дунёга тарқатилиши керак бўлган, куз-қиш коллекциясини тайёрлашга улгурилмайди. Биз 2021 йил баҳор коллекциясини тайёрлай олмаймиз. Кечикиш сабаб брендлар сентябрь ойидаги намойишларга тайёрлана олмайди», — деган мода палатаси вакили Карло Капаси.

Шунингдек, у «Италия мода саноати нафақат биз учун, балки ушбу ажойиб мамлакатнинг келажак авлодлари учун сақлаб қолиниши керак», — дея саноат томонидан​ тиббиёт ходимлари ва беморлар учун қисқа вақт ичида ҳимоя ниқоби ва халатлари саховатпешалик билан ишлаб чиқарилганини қўшимча қилган.

https://www.instagram.com/p/B-1_-zAIJ-5/?utm_source=ig_embed

Мактубда айтилишича, Италия Европа мамлакатлари орасида мода оламидаги энг йирик люкс буюмлар, кийим-кечак, пойабзал ва аксессуарлар ишлаб чиқаришда етакчи ҳисобланиб, ушбу саноатда 600 минг ишчи фаолият юритади.

Капасининг мурожаати «Мамлакат рамзи бўлган саноатни йў​қотишга тайёрмизми?», дея якунланган.