O‘zbekistonda koronavirusga chalinganlar soni karantinga olinganlar hisobiga ortmoqda. Bu haqda Sanitariya-epidemiologiya nazorati davlat inspeksiyasi boshlig‘i Nurmat Otabekov ma’lum qildi.
Uning so‘zlariga ko‘ra, ayni paytda O‘zbekistonda koronavirus kasalligiga chalinganlar bilan muloqotda bo‘lganlar, epidemik noxush hududdan olib kelingan fuqarolar, ularga tibbiy xizmat ko‘rsatayotgan tibbiyot xodimlari, sanitariya-epidemiologiya xizmati xodimlari ham karantinda bo‘lib turibdi.
Qayd etilishicha, karantindan asosiy maqsad ham xavf osti guruhiga mansub aholi orasidan kasallik yuqtirib olganlarni erta aniqlab olish va kasallik tarqalishiga yo‘l qo‘ymaslik hisoblanadi.
Nurmat Otabekovning aytishicha, profilaktik tibbiyotda karantin tadbirlari kasallik o‘chog‘ini aniqlash, jilovlash va bartaraf etish uchun qo‘llaniladi. Shuning uchun ham karantinga olinganlar orasidan kasallik chiqish ehtimoli bo‘lgan va bunga tayyorgarlik ko‘rilgan.
Sanitariya-epidemiologik osoyishtalik agentligining 2-aprel, payshanba kuni, bergan ma’lumotlariga ko‘ra, O‘zbekistonda 100 mingdan ortiq kishi karantinga olingan. Ularning 23 mingdan ortig‘i statsionar karantinda, 77 mingdan ortig‘i esa uy sharoitida karantin davrini o‘tamoqda. Mamlakatda 29 mingdan ortiq kishi koronavirusni aniqlash uchun tekshirilgan. Ayni vaqtga kelib 26 mingdan ortiq kishi karantindan chiqarilgan.
Mavzuga doir: Toshkentda koronavirusga chalingan yana bir bemor o‘zini uyda davolashga uringani ma’lum bo‘ldi. Hozirda uning ahvoli og‘ir
Avvalroq Nurmat Otabekov vaziyat jiddiy ekanligini, tavakkal qilishga hech kimning haqi yo‘qligini aytgan hamda ichki ishlar, Milliy gvardiya va OAV xodimlarini ehtiyotkorlikka chaqirgan edi.
Izoh (0)