Toshkentda koronavirusga chalingan yana bir bemor o‘zini uyda davolashga uringani ma’lum bo‘ldi. Hozirda uning ahvoli og‘ir
Toshkentda koronavirus infeksiyasini yuqtirib olganlikning klinik belgilari paydo bo‘lganiga qaramay, shifokorlarga murojaat qilmagan, oqibatda og‘ir ahvolda kasalxonaga yotqizilgan va sun’iy nafas olish apparatiga ulangan bemor haqida ma’lum qilindi. Bu haqda Vazirlar Mahkamasi huzuridagi Sanitariya-epidemiologiya nazorati davlat inspeksiyasi boshlig‘i Nurmat Otabekov “O‘zbekiston 24” telekanali orqali qilgan chiqishida aytib o‘tdi.
“Kuni kecha Epidemiologiya, mikrobiologiya va yuqumli kasalliklar institutiga X. ismli bemor olib kelingan. Olib kelinganidan keyin darhol sun’iy nafas olish apparatiga ulashga ehtiyoj tug‘ildi va ahvoli o‘ta og‘ir, deb baholandi”, — dedi Nurmat Otabekov.
“Shu o‘rinda savol tug‘iladi — shu vaqtgacha, kasallikning klinik belgilari paydo bo‘lganida, tibbiyot xodimiga murojaat qilmasdan, tavakkalchilik qilishga, e’tiborsiz bo‘lishga ushbu bemorning qanday haqi bor edi? U atrofidagilarni, yaqinlarini, oila a’zolarini, qo‘yingki keng jamoatchilikni xavf ostiga qo‘yishga qanday haqi bor edi? Mana shunday yo‘l tutish xiyonat ekanligini u anglab yetmadimi?”, — deya qo‘shimcha qildi hukumat vakili.
Avvalroq, koronavirusning O‘zbekistondagi ikkinchi qurboni ham o‘zini uyda davolashga uringani, so‘ng og‘ir ahvolda dastlab Toshkentdagi Epidemiologiya, mikrobiologiya va yuqumli kasalliklar ilmiy tekshirish instituti klinikasiga, keyin Virusologiya ilmiy-tekshirish institutiga yotqizilgani, oxir-oqibat vafot etgani haqida xabar berilgan edi.
Ma’lumot uchun, 3-aprel soat Toshkent vaqti bilan 9:00 holatiga O‘zbekistonda koronavirusga chalingan jami bemorlar soni 221 nafarga yetdi — ulardan 25 nafari sog‘ayib, reabilitatsiyaga o‘tkazilgan, ikki nafari esa vafot etgan.
