O‘zbekistondan qaytgan Qozog‘iston fuqarosida koronavirus aniqlangani va u Qoraqalpog‘istonning To‘rtko‘l tumanidagi to‘yda ishtirok etgani haqida xabar berilgan edi. Qoraqalpog‘iston Sog‘liqni saqlash vazirligi ushbu holat yuzasidan bayonot berdi.
Qayd etilishicha, vaziyat yuzasidan Qozog‘istonning tegishli idoralari tomonidan O‘zbekistonga rasmiy ma’lumot kelib tushmagan. Vazirlik tomonidan chuqurlashtirilgan profilaktik chora-tadbirlar (epidemiologik surishtiruv) o‘tkazilmoqda.
Ma’lum bo‘lishicha, 14-mart kuni Qozog‘istonda doimiy yashovchi 20 nafar fuqaro mikroavtobusda Qoraqalpog‘istonga mehmonga kelib, shularning 16 nafari To‘rtko‘l tumani “Tozabog‘yop” OFYda yashovchi fuqaroning uyida mehmon bo‘lib qolgan. Qolgan 4 nafar mehmon Ellikqal’a tumani “Ellikqal’a” OFYda yashovchi fuqaroning uyiga mehmonga ketgan.
Qozog‘istonlik fuqarolarning O‘zbekistonga kelishdan maqsadi to‘y marosimida ishtirok etish bo‘lgan.
14—25-mart kunlari oralig‘ida To‘rtko‘l tumanida bo‘lgan fuqarolar 3 xonadonda mehmonda bo‘lib, 18-mart kuni nikoh to‘yda qatnashgan. Ellikqal’a tumanida bo‘lgan fuqarolar 2 xonadonda mehmonda bo‘lgan.Mehmonga kelgan 20 nafar fuqaro 25-mart kuni To‘rtko‘l tumanidan Toshkent viloyatining “G‘ishtko‘prik” chegara posti orqali Qozog‘istonga chiqib ketgan. Yo‘lda ketayotib hech qayerda to‘xtamagan, boshqalar bilan muloqot qilmagan, o‘zlarining yonida bo‘lgan oziq-ovqat mahsulotlarini iste’mol qilgan.
Qozog‘iston fuqarolarining barchasi 26-mart kuni o‘z manzillariga yetib borgan va ular tegishli tartibda karantinga olingan. Ularning ichida 60 yoshli ayolda laboratoriya tekshiruvlari natijasi bo‘yicha koronavirus borligi gumon qilinib, yuqumli kasalliklar kasalxonasiga joylashtirilgan.
Ayolning yaqinlari bergan ma’lumotga ko‘ra, uning laboratoriya tekshiruv natijasi koronavirusni ko‘rsatgan bo‘lsa ham, ayolda va u bilan muloqotda bo‘lgan fuqarolarda kasallik belgilari yo‘q, ularning ahvoli yaxshi.
Vazirlik xabarida aytilishicha, To‘rtko‘l va Ellikqal’a tumanlarida qozog‘istonlik fuqarolar bilan muloqotda bo‘lgan odamlar aniqlanib, tibbiy ko‘rikdan o‘tkazilgan, tegishli laboratoriya tahlillari olingan. Ularning tana harorati nazoratga olinib, 14 kunlik uy sharoitidagi karantinga olingan. Shu kunga qadar bu fuqarolarning hech birida koronavirus kasalligining belgilari aniqlanmagan.
Qoraqalpog‘iston Sog‘liqni saqlash vazirining ma’lum qilishicha, To‘rtko‘l tumanida karantinga olingan 3 ta oilaning a’zolari koronavirusga test topshirgan va ularning hech birida infeksiya aniqlanmagan.
Bayonotda qo‘shimcha qilinishicha, 31-mart soat 22:30 holatiga ko‘ra Qoraqalpog‘istonda koronavirusga chalingan birorta bemor aniqlanmadi.
O‘zbekistonda 1-aprel Toshkent vaqti bilan 10:00 holatiga koronavirus infeksiyasi aniqlangan shaxslar soni 173 nafarni tashkil etmoqda. Virus mamlakatga kirib kelganidan beri ikki kishi bu kasallik oqibatida vafot etgan. Qozog‘istonda esa 363 kishida koronavirus aniqlangan bo‘lib, virusdan 3 kishi vafot etdi.
Izoh (0)