Ўзбекистондан қайтган Қозоғистон фуқаросида коронавирус аниқлангани ва у Қорақалпоғистоннинг Тўрткўл туманидаги тўйда иштирок этгани ҳақида хабар берилган эди. Қорақалпоғистон Соғлиқни сақлаш вазирлиги ушбу ҳолат юзасидан баёнот берди.
Қайд этилишича, вазият юзасидан Қозоғистоннинг тегишли идоралари томонидан Ўзбекистонга расмий маълумот келиб тушмаган. Вазирлик томонидан чуқурлаштирилган профилактик чора-тадбирлар (эпидемиологик суриштирув) ўтказилмоқда.
Маълум бўлишича, 14 март куни Қозоғистонда доимий яшовчи 20 нафар фуқаро микроавтобусда Қорақалпоғистонга меҳмонга келиб, шуларнинг 16 нафари Тўрткўл тумани «Тозабоғёп» ОФЙда яшовчи фуқаронинг уйида меҳмон бўлиб қолган. Қолган 4 нафар меҳмон Элликқалъа тумани «Элликқалъа» ОФЙда яшовчи фуқаронинг уйига меҳмонга кетган.
Қозоғистонлик фуқароларнинг Ўзбекистонга келишдан мақсади тўй маросимида иштирок этиш бўлган.
14—25 март кунлари оралиғида Тўрткўл туманида бўлган фуқаролар 3 хонадонда меҳмонда бўлиб, 18 март куни никоҳ тўйда қатнашган. Элликқалъа туманида бўлган фуқаролар 2 хонадонда меҳмонда бўлган.Меҳмонга келган 20 нафар фуқаро 25 март куни Тўрткўл туманидан Тошкент вилоятининг «Ғишткўприк» чегара пости орқали Қозоғистонга чиқиб кетган. Йўлда кетаётиб ҳеч қаерда тўхтамаган, бошқалар билан мулоқот қилмаган, ўзларининг ёнида бўлган озиқ-овқат маҳсулотларини истеъмол қилган.
Қозоғистон фуқароларининг барчаси 26 март куни ўз манзилларига етиб борган ва улар тегишли тартибда карантинга олинган. Уларнинг ичида 60 ёшли аёлда лаборатория текширувлари натижаси бўйича коронавирус борлиги гумон қилиниб, юқумли касалликлар касалхонасига жойлаштирилган.
Аёлнинг яқинлари берган маълумотга кўра, унинг лаборатория текширув натижаси коронавирусни кўрсатган бўлса ҳам, аёлда ва у билан мулоқотда бўлган фуқароларда касаллик белгилари йўқ, уларнинг аҳволи яхши.
Вазирлик хабарида айтилишича, Тўрткўл ва Элликқалъа туманларида қозоғистонлик фуқаролар билан мулоқотда бўлган одамлар аниқланиб, тиббий кўрикдан ўтказилган, тегишли лаборатория таҳлиллари олинган. Уларнинг тана ҳарорати назоратга олиниб, 14 кунлик уй шароитидаги карантинга олинган. Шу кунга қадар бу фуқароларнинг ҳеч бирида коронавирус касаллигининг белгилари аниқланмаган.
Қорақалпоғистон Соғлиқни сақлаш вазирининг маълум қилишича, Тўрткўл туманида карантинга олинган 3 та оиланинг аъзолари коронавирусга тест топширган ва уларнинг ҳеч бирида инфекция аниқланмаган.
Баёнотда қўшимча қилинишича, 31 март соат 22:30 ҳолатига кўра Қорақалпоғистонда коронавирусга чалинган бирорта бемор аниқланмади.
Ўзбекистонда 1 апрель Тошкент вақти билан 10:00 ҳолатига коронавирус инфекцияси аниқланган шахслар сони 173 нафарни ташкил этмоқда. Вирус мамлакатга кириб келганидан бери икки киши бу касаллик оқибатида вафот этган. Қозоғистонда эса 363 кишида коронавирус аниқланган бўлиб, вирусдан 3 киши вафот этди.
Изоҳ (0)