O‘zbekiston Prezidenti Shavkat Mirziyoyevning topshirig‘iga muvofiq, koronavirusning kirib kelishi va tarqalishini oldini olish yuzasidan chora-tadbirlar dasturini tayyorlash bo‘yicha respublika maxsus komissiyasining qarori bilan bir qator cheklovlar o‘rnatildi.
20-aprelgacha viloyatlararo, Toshkent va Nukus shaharlari hamda viloyatlar markazlarida Davlat xizmatlari markazlari tomonidan beriladigan maxsus ruxsatnoma (stiker)lar asosida avtotransport vositalari harakatlanishiga ruxsat etilgan. Davlat xizmatlari markazlariga ko‘plab fuqarolar tashrifi kuzatilgani sababli mazkur ruxsatnoma uchun arizalar faqat elektron shaklda qabul qilinishni boshlagan.
Keyinroq ruxsatnoma (stiker) olishga ariza yuborishda id.gov.uz orqali avtorizatsiyadan o‘tish talab etilmasligi ma’lum qilindi. Ariza yuborish uchun Yagona interaktiv davlat xizmatlari portalining ushbu sahifasiga o‘tib, so‘ralgan ma’lumotlarni jo‘natish kerak. Xizmat Top xizmatlar qatoriga qo‘shilgan va Yagona interaktiv davlat xizmatlari portalining bosh sahifasiga chiqarilgan.
Avval Adliya vazirligi huzuridagi Davlat xizmatlari agentligi 1-aprelgacha shaxsiy avtomobillardan ruxsatnomasiz foydalanish mumkinligini rad etgani, Ichki ishlar vazirligi ruxsatnoma stikeri bo‘lmagan avtomashinalar haydovchilariga qanday jazo qo‘llanishini ma’lum qilgani xabar qilingandi.
31-mart kuni tunda esa Respublika maxsus komissiyasi qaroriga ko‘ra, transport harakati uchun maxsus ruxsatnoma berishning yangi tartibi e’lon qilindi.
“Daryo” muxbiri mazkur yangiliklardan so‘ng turar joy majmualari, hovlilarda to‘lib turgan, foydalanilmayotgan shaxsiy avtomobillarni kadrlarga muhrladi.
Toshkent shahrining Mirzo Ulug‘bek tumanidagi aholi yashash joylaridagi shaxsiy avtomobillar
Toshkent shahrining Mirobod tumanidagi aholi yashash joylaridagi shaxsiy mashinalar
Toshkent shahrining Chilonzor tumanidagi aholi yashash joylaridagi avtomobillar
Izoh (0)