31-mart soat 10:00 holatiga ko‘ra butun O‘zbekiston bo‘yicha 90 mingdan ortiq fuqaro tibbiy kuzatuvga olingan. Bu haqda Vazirlar Mahkamasi huzuridagi Sanitariya-epidemiologiya nazorat davlat inspeksiyasi boshlig‘i Nurmat Otabekov “O‘zbekiston 24” telekanalidagi chiqishida aytib o‘tdi.
“Bugungi kunga kelib Qoraqalpog‘iston Respublikasi, viloyatlar va Toshkent shahrida 90 mingdan ko‘proq fuqarolarimiz tibbiy kuzatuv ostiga olingan. Ularning orasidan ham kasallik chiqib qolishi ehtimoli yo‘q emas. Shunday ekan, kasallik qo‘zg‘atuvchisi O‘zbekiston hududida aylanib yuribdi”, — dedi Nurmat Otabekov.
Hukumat vakilining alohida ta’kidlashicha, har bir fuqaro ko‘chaga chiqishdan, ortiqcha muloqotga kirishishdan tiyilishi, o‘zini o‘zi ehtiyot qilishi lozim.
“Muloqotni kamaytirsakkina kasallikning bir odamdan ikkinchi odamga yuqishiga yo‘l qo‘ymaymiz. Hammamiz mas’uliyat bilan yondashaylik. Bu davr o‘tkinchi. Eng asosiysi, sabr bilan, tibbiyot xodimlarining bergan tavsiyalariga amal qilish bilan safarbarlik jarayonidagi ishtirokimizni ko‘rsatishimiz kerak”, — dedi u.
Ma’lumot uchun, 31-mart Toshkent vaqti bilan 10:00 holatiga ko‘ra O‘zbekistonda 158 kishida koronavirus infeksiyasi aniqlangan, ulardan ikki nafari vafot etgan, yetti nafari sog‘aygan. Koronavirus tashxisi bilan Toshkentdagi Virusologiya ilmiy-tekshirish instituti klinikasida davolanayotgan 22 bemorda pnevmoniya belgilari tasdiqlangan, besh bemorning ahvoli og‘ir.
Hukumat koronavirusning yanada tarqalib ketishini oldini olish maqsadida 30-mart soat 6:00 dan boshlab Toshkent va Nukus shaharlari, viloyatlar markazlarida shaxsiy avtomobilda maxsus stiker (ruxsatnoma)siz harakatlanishni taqiqladi. Fuqarolarga o‘ta zaruratsiz ko‘chaga chiqish, ko‘chada niqobsiz yurish va uch kishidan ortiq bo‘lib to‘planish taqiqlandi.
Izoh (0)