31 март соат 10:00 ҳолатига кўра бутун Ўзбекистон бўйича 90 мингдан ортиқ фуқаро тиббий кузатувга олинган. Бу ҳақда Вазирлар Маҳкамаси ҳузуридаги Санитария-эпидемиология назорат давлат инспекцияси бошлиғи Нурмат Отабеков «Ўзбекистон 24» телеканалидаги чиқишида айтиб ўтди.
«Бугунги кунга келиб Қорақалпоғистон Республикаси, вилоятлар ва Тошкент шаҳрида 90 мингдан кўпроқ фуқароларимиз тиббий кузатув остига олинган. Уларнинг орасидан ҳам касаллик чиқиб қолиши эҳтимоли йўқ эмас. Шундай экан, касаллик қўзғатувчиси Ўзбекистон ҳудудида айланиб юрибди», — деди Нурмат Отабеков.
Ҳукумат вакилининг алоҳида таъкидлашича, ҳар бир фуқаро кўчага чиқишдан, ортиқча мулоқотга киришишдан тийилиши, ўзини ўзи эҳтиёт қилиши лозим.
«Мулоқотни камайтирсаккина касалликнинг бир одамдан иккинчи одамга юқишига йўл қўймаймиз. Ҳаммамиз масъулият билан ёндашайлик. Бу давр ўткинчи. Энг асосийси, сабр билан, тиббиёт ходимларининг берган тавсияларига амал қилиш билан сафарбарлик жараёнидаги иштирокимизни кўрсатишимиз керак», — деди у.
Маълумот учун, 31 март Тошкент вақти билан 10:00 ҳолатига кўра Ўзбекистонда 158 кишида коронавирус инфекцияси аниқланган, улардан икки нафари вафот этган, етти нафари соғайган. Коронавирус ташхиси билан Тошкентдаги Вирусология илмий-текшириш институти клиникасида даволанаётган 22 беморда пневмония белгилари тасдиқланган, беш беморнинг аҳволи оғир.
Ҳукумат коронавируснинг янада тарқалиб кетишини олдини олиш мақсадида 30 март соат 6:00 дан бошлаб Тошкент ва Нукус шаҳарлари, вилоятлар марказларида шахсий автомобилда махсус стикер (рухсатнома)сиз ҳаракатланишни тақиқлади. Фуқароларга ўта заруратсиз кўчага чиқиш, кўчада ниқобсиз юриш ва уч кишидан ортиқ бўлиб тўпланиш тақиқланди.
Изоҳ (0)