“Real” klubi jamoa o‘yinchilarining maoshini kamaytirish haqida o‘ylamoqda.
El Pais nashrining xabar qilishicha, garchi madridliklar rahbariyati karantinning dastlabki kunlarida bu borada optimistik kayfiyatda bo‘lgan bo‘lsada, hozirga kelib futbolchi va basketbolchilarning maoshini kamaytirish varianti haqida o‘ylamoqda. Klub maoshlar uchun 800 million yevro sarflaydi.
Izolyatsiyaning dastlabki kunlarida “Real” prezidenti Florentino Peres jamoa sardori Serxio Ramosga maoshlar kamaymasligini aytgan.
Madridliklar rahbariyati La Liga va Chempionlar Ligasi o‘yinlari davom etishiga ishongan va shu boisdan maoshlar masalasiga katta e’tibor qaratmagan. Bundan tashqari, “Real” pandemiya paytida “Barselona”dan ko‘ra kamroq zarar ko‘rdi. “Real”ning toza qarzi 27 million yevroni tashkil etadi. “Barselona”da esa bu ko‘rsatkich 217 millionga teng. Avvalroq katalon klubi futbolchilarning maoshini 70 foizgacha qisqartirishi ma’lum bo‘lgandi.
“Qirollik klubi” joriy mavsum o‘yinlardan 161,3 million yevro va teletranslyatsiyalardan 179,8 million yevro daromad ko‘rishni mo‘ljal qilgandi. Ayni damda “Real” zararga kirishi oydinlashib qoldi.
Klub hozircha maoshlarni qisqartirish formulasini ishlab chiqqani yo‘q. Shuningdek, “Real” rahbariyati bu masalani futbolchilar bilan maslahatlashgan holda yaqin ikki hafta ichida hal qilmoqchi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)