«Реал» клуби жамоа ўйинчиларининг маошини камайтириш ҳақида ўйламоқда.
El Pais нашрининг хабар қилишича, гарчи мадридликлар раҳбарияти карантиннинг дастлабки кунларида бу борада оптимистик кайфиятда бўлган бўлсада, ҳозирга келиб футболчи ва баскетболчиларнинг маошини камайтириш варианти ҳақида ўйламоқда. Клуб маошлар учун 800 миллион евро сарфлайди.
Изоляциянинг дастлабки кунларида «Реал» президенти Флорентино Перес жамоа сардори Серхио Рамосга маошлар камаймаслигини айтган.
Мадридликлар раҳбарияти Ла Лига ва Чемпионлар Лигаси ўйинлари давом этишига ишонган ва шу боисдан маошлар масаласига катта эътибор қаратмаган. Бундан ташқари, «Реал» пандемия пайтида «Барселона»дан кўра камроқ зарар кўрди. «Реал»нинг тоза қарзи 27 миллион еврони ташкил этади. «Барселона»да эса бу кўрсаткич 217 миллионга тенг. Аввалроқ каталон клуби футболчиларнинг маошини 70 фоизгача қисқартириши маълум бўлганди.
«Қироллик клуби» жорий мавсум ўйинлардан 161,3 миллион евро ва телетрансляциялардан 179,8 миллион евро даромад кўришни мўлжал қилганди. Айни дамда «Реал» зарарга кириши ойдинлашиб қолди.
Клуб ҳозирча маошларни қисқартириш формуласини ишлаб чиққани йўқ. Шунингдек, «Реал» раҳбарияти бу масалани футболчилар билан маслаҳатлашган ҳолда яқин икки ҳафта ичида ҳал қилмоқчи.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)