Ayni kunda O‘zbekistonda karantin e’lon qilingan bo‘lib, ushbu vaqtda virusning keng tarqalmasligi uchun barcha zarur chora-tadbirlar amalga oshirilmoqda. Xususan, Toshkent shahriga kelib ishlayotgan, ta’lim olayotgan yurtdoshlar va xorijiy mehmonlarning poytaxtda bo‘lishlari vaqtincha cheklanmoqda. Bu esa faoliyati jamoatchilik bilan aloqador bo‘lgan sohalarga o‘z ta’sirini o‘tkazmoqda, deb xabar berdi “Toshshahartransxizmat”.
Jumladan, jamoat transportida yo‘lovchi oqimining keskin qisqarishi natijasida tig‘iz vaqtlardan tashqari avtobuslarning yo‘nalishlarda yo‘lovchisiz harakatlanishi kuzatilmoqda. Bu o‘z-o‘zidan transport vositalarining sababsiz yemirilishiga, yoqilg‘i-moylash mahsulotlarining samarasiz sarflanishiga sabab bo‘lmoqda.
Ana shu jihatlarni inobatga olib, “Toshshahartransxizmat” AJ tasarrufidagi yo‘nalishlarda qatnayotgan avtobuslar harakat jadvaliga vaqtinchalik o‘zgartirishlar kiritildi. Xususan, 2020-yilning 19-martidan boshlab yo‘lovchi oqimi keskin kamaygan vaqtlar — soat 10:00 dan 16:00 ga qadar avtobuslar harakati oraliq intervallari uzaytirilmoqda.
Bundan maqsad — transport vositalaridan samarali foydalanishdir. Vaqtincha yuzaga kelgan bunday noqulaylik uchun uzr so‘raymiz, deyilgan “Toshshahartransxizmat” matbuot xizmatining xabarida.
18-mart holatiga ko‘ra, O‘zbekistonda koronavirusga chalinganlar soni 18 nafarga yetgan. Avvalroq O‘zbekistonda koronavirus sababli zarar ko‘rishi mumkin bo‘lgan sohalarda soliq ta’tillari berilishi rejalashtirilayotgani, ichki sayohatlar va ommaviy tadbirlar vaqtincha to‘xtatilgani, O‘zbekiston Markaziy banki koronavirusdan saqlanish uchun naqd pullardan kamroq foydalanishni tavsiya etgani, shuningdek, Toshkentdagi barcha talabalar turar joylari 19-martdan to‘liq yopilib, dezinfeksiya qilinishi haqida xabarlar berilgan.
Izoh (0)