“Yangiobod” sayyohlik bazasining mulkdor tomonidan majburiy baholanishi haqidagi sud qarori o‘zgarishsiz qoldi

Toshkent viloyati Angen tumanida joylashgan “Yangiobod” sayyohlik bazasi uning mulkdori tomonidan o‘z hisobidan majburiy tartibda baholanishi va baholash natijalarini Angren shahar hokimligiga taqdim etishi haqidagi sud qarori o‘zgarishsiz qoldi. Mazkur qaror Ohangaron tumanlararo iqtisodiy sudi tomonidan 2020-yil 24-yanvarda qabul qilingan edi.

O‘zbekiston Oliy sudi axborot xizmati tomonidan ma’lum qilinishicha, 2020-yilning 5-mart kuni Toshkent shahar iqtisodiy sudining apellyatsiya instansiyasi sayyohlik bazasi egasi tomonidan berilgan appelyatsiya shikoyatini ko‘rib chiqqan.

Qayd etilishicha, da’vogarlar Angren shahar prokurori va Angren shahar hokimligi Ohangaron tumanlararo iqtisodiy sudiga da’vo ariza bilan murojaat qilib, javobgar “Yangiabad Jemchujina Chatkala” mas’uliyati cheklangan jamiyatining zimmasiga umumiy maydoni 10 gektardan iborat bo‘lgan yer uchastkasi hamda ushbu yer uchastkasida joylashgan bino va inshootlarni o‘z hisobidan baholab, baholash hisobotini Angren shahar hokimligiga taqdim etish majburiyatini yuklashni so‘ragan.

Sudning 2020-yil 15-yanvardagi ajrimiga asosan, ishga nizoning predmetiga nisbatan mustaqil talablar bilan arz qilmaydigan uchinchi shaxs sifatida Toshkent viloyati Yer resurslari va davlat kadastri boshqarmasining Angren shahar bo‘limi jalb qilingan.

Ishni birinchi instatsiya sudida ko‘rish jarayonida Angren shahar prokurori qo‘shimcha da’vo arizasini taqdim etib, javobgarga sayyohlik bazasini Angren shahar hokimligiga topshirish majburiyatini yuklashni so‘ragan. Ohangaron tumanlararo iqtisodiy sudining 2020-yil 24-yanvardagi hal qiluv qarori bilan da’vogarning da’vo arizasi qanoatlantirilgan.

Ma’lum qilinishicha, hal qiluv qarori ustidan javobgar tomonidan apellyatsiya shikoyati berilib, hal qiluv qarorini bekor qilish va ish yuritishni tugatish to‘g‘risidagi talablar qo‘yilgan.

Oliy sud tomonidan qayd etilishicha, 5-mart kuni bo‘lib o‘tgan sud majlisida ishtirok etgan Toshkent shahar prokurori yordamchisi apellyatsiya shikoyatini rad qilishni va hal qiluv qarorini o‘zgarishsiz qoldirishni so‘ragan.

Sud muhokamasining vaqti va joyi to‘g‘risida tegishli tartibda xabardor qilingan taraflar vakillari apellyatsiya instansiyasining sud majlisida ishtirok etmagan, deyiladi xabarda.

“Gazeta.uz”ning yozishicha, “Yangiobod” sayyohlik bazasi Ohangaron tumanlararo iqtisodiy sudining qarori ustidan apellyatsiya shikoyati bergan. “Yangiobod” sayyohlik bazasi advokati Azimjon Rahmatovning aytishicha, sud majlisi 5-mart kuni Toshkent viloyati iqtisodiy sudining apellyatsiya instansiyasida bo‘lib o‘tishi kerak edi, ammo o‘sha kuni sayyohlik bazasi vakillari kvorum (apellyatsiyani ko‘rib chiqadigan sudyalarning yetarli soni) yig‘ilmagani sababli ish ko‘rilmasligi to‘g‘risida xabardor qilingan.

Uning so‘zlariga ko‘ra, ularga Oliy sud ishni ko‘rib chiqish uchun qayerga yuborishni belgilashi kerakligi ma’lum qilingan. Bu Toshkent shahar iqtisodiy sudi yoki Sirdaryo viloyat iqtisodiy sudi bo‘lishi mumkinligi aytilgan.

Biroq keyinchalik ma’lum bo‘lishicha, ish Toshkent shahar iqtisodiy sudining apellyatsiya instansiyasiga yuborilgan va sud majlisi 5-mart kuni bo‘lib o‘tgan. Sud ishi bayonnomasida bildirishnomaga qaramay, da’vogar tomoni sudda ishtirok etmagani ko‘rsatilgan.

Sayyohlik bazasi egasi Ali To‘xtayev ish materiallari bilan faqat 15-mart kuni, davlat ijrochilari sud qarorining nusxasini olib kelganida tanishgan. Sayyohlik bazasi advokati ushbu masala bo‘yicha Oliy sudga nazorat shikoyati berilishini ma’lum qilgan.

“Ushbu masala bo‘yicha biz Oliy sudga nazorat shikoyatini yuboramiz. Xususan, protsessual qoidalarni qo‘pol ravishda buzganliklari uchun. Ish bir suddan boshqasiga o‘tkazilganligi sababli, ishni ko‘rib chiqish uchun qabul qilgan sudya sud muhokamasi kuni va vaqti to‘g‘risida taraflarni xabardor qilishi kerak edi. Bunday ogohlantirish bo‘lmagan”, — dedi advokat.

Shuningdek, advokat ish materiallarida sudya A.Narzullayevning ishni tayyorlash uchun qabul qilish hamda sud majlisining sanasi va vaqtini belgilash to‘g‘risidagi qarori mavjud emasligini ta’kidlagan.

“Gazeta.uz”ning yozishicha, “Yangiobod” sayyohlik bazasi ishi Toshkent shahar iqtisodiy sudining ish jadvalida ham ko‘rsatilmagan.

Sayyohlik bazasi egasi Ali To‘xtayev mazkur holat bo‘yicha biznes-ombudsmanga ham murojaat qilgan.

Kompaniya oldingi sud qarorlarini bekor qilish uchun Oliy sudning Ma’muriy ishlar bo‘yicha sud hay’atiga nazorat shikoyatini yuborgan, ammo 4-fevral kuni rad javobini olgan.

Shuningdek, Ali To‘xtayev Oliy sud raisi Kozimjon Komilov nomiga nazorat shikoyati yuzasidan ariza yozgan va hozircha javob kutmoqda.