The Economist Intelligence Unit eng arzon va eng qimmat shaharlar reytingini e’lon qildi. Toshkent ro‘yxatda 132-o‘rinda qayd etildi hamda eng arzon, ya’ni yashash uchun zarur narsalar narxi yuqori bo‘lmagan shaharlar o‘nligida qoldi.
O‘tgan yil bilan taqqoslaganda poytaxtning reytingda bir pog‘ona pastlaganini ko‘rish mumkin, ekspertlarning fikricha, bu 2017-yilda O‘zbekistonda valyuta devalvatsiyasi boshlangani bilan bog‘liq.
Suriya poytaxti Damashq shahri 133-o‘rinda qayd etildi va reytingdagi hududlar orasida eng arzoni deb topildi. Qozog‘istonning Olmaota shahri ham 131-o‘rinni egallab, eng arzon shaharlar o‘nligiga kirgan.
EIU tahlilchilari reytingda quyi pog‘onalarni egallagan shaharlarning ayrimlarida valyuta risklari kattaligi, ba’zilarida esa siyosiy barqarorlik yo‘qligi ushbu tendensiyaga sabab bo‘lganini ta’kidlagan.
Eng qimmat shaharlarga Singapur, Gonkong va Osaka kirgan, uchala shahar ham bir xil ball bilan 1-o‘rinda qayd etilgan. Ulardan keyingi o‘rinlarni Nyu-York, Parij, Syurix, Tel-Aviv, Los-Anjeles, Tokio va Jeneva egallagan.
Worldwide Cost of Living reytingi 133 ta shaharni qamrab olgan va ularni 160 ta kategoriya bo‘yicha, jumladan, oziq-ovqat mahsulotlari, kiyim-kechak, turar joy ijarasi, transport, kommunal xizmatlar, maktablardagi ta’lim narxi va boshqa ijtimoiy masalalarning ta’minlanganlik darajasini tahlil qiladi. Tadqiqotlar ushbu shaharlarga keladigan ekspatriant (chet ellik ishchi yoki korxonaning chet elda ishlaydigan xodimi) va biznesmenlarning kompensatsiya paketini hisoblab chiqish uchun amalga oshiriladi.
Mavzuga doir: The Economist Intelligence Unit demokratiya indeksini e’lon qildi. O‘zbekiston 167 davlat orasida 157-o‘rinda
Izoh (0)