Айни кунда Ўзбекистонда карантин эълон қилинган бўлиб, ушбу вақтда вируснинг кенг тарқалмаслиги учун барча зарур чора-тадбирлар амалга оширилмоқда. Хусусан, Тошкент шаҳрига келиб ишлаётган, таълим олаётган юртдошлар ва хорижий меҳмонларнинг пойтахтда бўлишлари вақтинча чекланмоқда. Бу эса фаолияти жамоатчилик билан алоқадор бўлган соҳаларга ўз таъсирини ўтказмоқда, деб хабар берди «Тошшаҳартрансхизмат».
Жумладан, жамоат транспортида йўловчи оқимининг кескин қисқариши натижасида тиғиз вақтлардан ташқари автобусларнинг йўналишларда йўловчисиз ҳаракатланиши кузатилмоқда. Бу ўз-ўзидан транспорт воситаларининг сабабсиз емирилишига, ёқилғи-мойлаш маҳсулотларининг самарасиз сарфланишига сабаб бўлмоқда.
Ана шу жиҳатларни инобатга олиб, «Тошшаҳартрансхизмат» АЖ тасарруфидаги йўналишларда қатнаётган автобуслар ҳаракат жадвалига вақтинчалик ўзгартиришлар киритилди. Хусусан, 2020 йилнинг 19 мартидан бошлаб йўловчи оқими кескин камайган вақтлар — соат 10:00 дан 16:00 га қадар автобуслар ҳаракати оралиқ интерваллари узайтирилмоқда.
Бундан мақсад — транспорт воситаларидан самарали фойдаланишдир. Вақтинча юзага келган бундай ноқулайлик учун узр сўраймиз, дейилган «Тошшаҳартрансхизмат» матбуот хизматининг хабарида.
18 март ҳолатига кўра, Ўзбекистонда коронавирусга чалинганлар сони 18 нафарга етган. Аввалроқ Ўзбекистонда коронавирус сабабли зарар кўриши мумкин бўлган соҳаларда солиқ таътиллари берилиши режалаштирилаётгани, ички саёҳатлар ва оммавий тадбирлар вақтинча тўхтатилгани, Ўзбекистон Марказий банки коронавирусдан сақланиш учун нақд пуллардан камроқ фойдаланишни тавсия этгани, шунингдек, Тошкентдаги барча талабалар турар жойлари 19 мартдан тўлиқ ёпилиб, дезинфекция қилиниши ҳақида хабарлар берилган.
Изоҳ (0)